Unha volta ao cole sostible con Alimentes

Xa estamos en posición de saída para a volta ao cole! Hoxe retornan ás aulas os escolares castelán leoneses e o luns farano as alumnas e os alumnos galegos. Desde hai uns días, as familias están inmersas nos preparativos deste novo curso escolar. Ademais de libros e materiais, tamén é o momento de planificar os tentempés que encherán as mochilas dos máis pequenos da casa durante estes meses. Xunto cos menús semanais, esta tamén é unha parte importante para lograr que o regreso ás aulas sexa sostible e saudable, non che parece?

O equipo de Gadis volve coas pilas cargadas e con moita ilusión por todos os proxectos que temos por diante. Entre eles, a cuarta edición de Alimentes Dixital, a plataforma educativa en liña coa que promovemos hábitos para unha vida saudable e sostible entre o profesorado e o alumnado de Galicia e Castela e León. E que mellor maneira de empezar a quentar motores que compartindo algúns tips de sostibilidade e de alimentación para a volta ao cole?! Comezamos?

Unha volta ao cole sostible con Alimentes

O verán adoita deixarnos unha materia pendente coas rutinas. Reláxanse cos horarios estivais e iso conleva que tamén se descoiden outros aspectos, verdade? Por iso, setembro sempre é un bo mes para retomar os costumes e reestruturar hábitos. Así, podemos tentar introducir algún cambio para mellorar a alimentación e reducir o impacto na contorna.

Para iso, propoñémosche que botes man dos nosos decálogos para unha vida sostible e saudable, que foron fonte de inspiración para o desenvolvemento do noso programa Alimentes e que poden axudarche a realizar esas pequenas modificacións que lograrán que o volta cole sexa máis sostible. Aquí recollemos algúns deses consellos:

• Consume unha gran variedade de alimentos para que a dieta sexa equilibrada e conteña os nutrientes necesarios.
• Prioriza os productos frescos fronte aos procesados. Isto é clave para os tentempés, que adoita ser a inxesta na que se introducen máis procesados.
• A hidratación é clave e a auga é a mellor bebida.
• Limita o consumo de doces, refrescos e lambetadas. Deben ser a excepción, non a regla 😉.
• Mantén unha actividade física diaria. Seguramente xa oíches falar do NEAT (Non Exercise Activity Thermogenesis), é dicir, a actividade termoxénica non asociada ao exercicio. Animámoste a que trates de aumentar os movementos cotiáns que axudan a elevar o gasto calórico: usar as escaleiras en lugar do ascensor, desprazarse camiñando, quedar de pé no canto de sentar…
• Durme ben e suficiente.
• Prioriza o consumo de alimentos locais e de tempada.
• Le as etiquetas dos produtos.
• Conxela ou aproveita os alimentos restantes. O desperdicio alimentario é un problema grave.
• Almacena adecuadamente os alimentos para reducir o desperdicio.
• Fíxate no envoltorio dos produtos para reducir a xeración de residuos.

Como conseguir unha volta ao cole sostible con Alimentes?

Alimentes é o programa educativo de Gadis para fomentar hábitos de consumo responsable e de alimentación saudable, no que se inclúen consellos como os que imos compartir. É importante ter en conta que o factor máis importante para conseguir o obxectivo é a organización. Elaborar con antelación menús semanais e a lista da compra pode marcar a diferenza para que logres manter unha dieta variada e equilibrada e para reducir ao máximo o desperdicio alimentario.

Coñeces o prato ALIMENTES. O menú saudable? É a guía visual que creamos para axudar a deseñar comidas equilibradas e pode ser unha ferramenta moi útil para a planificación dos teus menús. Ademais, podes consultar algunhas das ideas de almorzos, merendas, comidas e ceas que fomos publicando no noso blog, ás que ir engadindo as túas propias propostas para ampliar o abanico de posibilidades, adaptándoas aos produtos de tempada.

No que respecta á preparación do material e os últimos detalles para a volta ao cole, deixámosche algunhas claves para fomentar a sustentabilidade:

• Opta por materiais e recipientes reutilizables para o tentempé: unha botella termo que, ademais, axudará a manter a auga fresca; unha fiambreira ou un envoltorio para bocadillos reutilizable; pano de mesa de tea…
• Reutiliza todos os materiais que estean en boas condicións do curso anterior.
• Pregunta a familia e amigos para aproveitar roupa e material que xa non utilicen.
• Procura que as túas compras sexan sostibles, apostando por criterios de proximidade, de respecto polo medio ambiente e pola xustiza social. Confirma que os artigos inclúen a marcado CE que garante o cumprimento dos requisitos de fabricación e de seguridade esixidos pola Unión Europea.
• Fomenta o coidado das pertenzas, converténdote en exemplo para que os teus fillos e fillas vaian aprendendo e asumindo as súas responsabilidades. Se algo se estraga, trata de reparalo con eles e elas antes de pensar en comprar un novo.
• Se algo xa non se pode utilizar, entón tocará reciclar. Asegúrate de depositar os residuos no contedor adecuado.
• Involucra aos máis pequenos na planificación dos seus tentempés saudables. Busca a variedade e aposta polos produtos de tempada. Aquí tes algunhas ideas

O máis importante desta volta ao cole é que sexa un momento de goce en familia. Podedes reforzar a aposta pola sustentabilidade se decidides ir andando, en bicicleta ou en patinete ao cole. Cero emisións no voso desprazamento 😉. Feliz comezo de curso!