Pequenos cambios con impacto: hábitos saudables para o benestar das persoas e o planeta

Coa chegada de setembro, aos poucos imos entrando de novo nas nosas rutinas. Acábanse as vacacións, comeza o colexio, a volta ao traballo… Pero tamén é momento de reencontros, de compartir as experiencias e aventuras dos últimos meses e de retomar o ritmo.

En ocasións, a inercia do día a día lévanos a resistirnos a incorporar novos hábitos que, con moi pouco esforzo, poden xerar un impacto positivo significativo, tanto nas persoas como na contorna. Nesta publicación compartimos algúns hábitos, recomendacións e propostas de cambio que se poden implementar coa chegada do outono para coidar da nosa saúde e tamén da do planeta.

Xestos sostibles para coidarnos e coidar o planeta

Estes son algúns pequenos xestos que podemos implementar para minimizar o noso impacto no medio e adoptar hábitos saudables:

• Menú semanal e visitas ao supermercado para adquirir produtos frescos. Deseñar un menú semanal saudable e equilibrado é unha maneira de garantir unha ampla variedade nutricional. Se planeamos as nosas comidas con antelación, podemos mitigar tamén o desperdicio alimentario. Combinar unha compra semanal grande con visitas ao supermercado para adquirir produtos frescos permite minimizar o noso impacto no medio ambiente á vez que aseguramos unha maior calidade dos produtos. Ademais, se incorporamos receitas de aproveitamento, podemos evitar o desperdicio alimentario.

• Mantén unha boa hidratación. A auga é un recurso vital para coidar do noso benestar e do do planeta. Beber aproximadamente 2 litros de auga ao día contribúe a reducir o risco de padecer enfermidades, favorece o benestar físico, aumenta a enerxía, mellora o descanso e a produtividade. A auga é un recurso moi prezado, imprescindible para as persoas pero tamén para o planeta. Por iso, é necesario realizar un consumo responsable e non malgastala.
• Dieta equilibrada co Prato Alimentes. O Prato Alimentes é unha ferramenta visual de Gadis para o seu proxecto educativo Alimentes. Inspirado no Prato Harvard, contén un sinxelo esquema que mostra as proporcións adecuadas dos distintos grupos de alimentos e inclúe orientación sobre as racións diarias recomendadas.
• Exercicio físico. Combinar unha dieta saudable cun estilo de vida activo é imprescindible para coidar da nosa saúde a longo prazo. Practicar deporte, priorizar medios de transporte que impliquen movemento, como camiñar ou ir en bicicleta, ten un impacto positivo directo na nosa saúde física e mental, favorece os nosos niveis de enerxía, fortalece o sistema inmunolóxico e a autoestima.

• Hábitos de soño. Un bo descanso é fundamental para o benestar físico, mental e emocional. En función de aspectos como a idade, o estado de saúde ou o estilo de vida, é posible que necesitemos máis ou menos horas de soño. Durmir a cantidade de horas adecuada axuda a aumentar a enerxía e a produtividade, mellorando a saúde física, mental e emocional. Para conseguir un hábito de descanso saudable, é importante crear unha rutina de soño, ter un estilo de vida activo, crear un ambiente cómodo para durmir e evitar cafeína e pantallas nas horas previas ao descanso.
• Desconexión dixital e tempo sen pantallas. No ámbito laboral, a desconexión dixital é un dereito das persoas traballadoras que lles permite salvagardar o tempo de descanso, a vida persoal e a conciliación. Implementar unha redución do tempo de pantallas axuda a reducir o estrés e a ansiedade, mellora a concentración, a produtividade, a calidade do soño e prevén o esgotamento dixital. Á súa vez, favorece as relacións persoais e as actividades físicas ou creativas que contribúen a mellorar a autoestima, a fortalecer os vínculos persoais e ofrecen interaccións positivas.

• Compra e consumo responsables. Priorizar o consumo de alimentos frescos, de proximidade e ecolóxicos ten un beneficio directo na nosa saúde e tamén un impacto económico positivo nas comunidades locais. Comprar alimentos de tempada, de produtores locais e de orixe ecolóxica achega un maior índice de nutrientes, mentres ofrece un sabor máis potente e un menor impacto no medio ambiente durante o proceso de produción e compra.
• Utilizar bolsas e envases reutilizables para os produtos frescos. Cada xesto conta e por iso en Gadis ofrecemos unha ampla selección de produtos a granel. Isto permite á nosa clientela escoller as cantidades que necesitan e reducir o desperdicio alimentario. Evitamos o plástico dun só uso e ofrecemos alternativas respectuosas co medioambiente para transportar os produtos. Temos opcións para todos os gustos e tamén vendemos bolsas de malla ou envases de cristal que se poidan reutilizar e minimizar o impacto negativo das nosas compras.

O impacto positivo dos hábitos saudables

Con pequenos xestos podemos xerar grandes cambios. Priorizar a saúde das persoas e o coidado do planeta debe ser unha prioridade para o desenvolvemento socioeconómico e para a loita contra o cambio climático. Con estes pequenos xestos achegámonos á consecución das metas dos ODS 3. Saúde e benestar, ODS 10. Redución das desigualdades, ODS 11. Cidades e comunidades sostibles, ODS 12. Produción e consumo responsables e ODS 13. Acción polo clima.