Un ano máis, Alimenta a Amizade!

Por oitavo ano consecutivo, impulsamos Alimenta a Amizade, a campaña de Gadis para a recollida de alimentos, artigos de hixiene e achegas económicas destinadas ao coidado de gatos e cans sen fogar. Este ano queremos poñer o foco nas persoas que fan posible non só o desenvolvemento desta iniciativa, senón tamén que miles de animais sen fogar reciban os coidados e a asistencia que necesitan. As 84 entidades de protección animal de Galicia e Castela e León que participan nesta edición contan cunha rede de voluntariado que fai posible o seu labor diario e que participa de xeito activo na campaña.

Coincidindo coa celebración do Día Mundial dos Animais, Alimenta a Amizade busca concienciar sobre os dereitos dos animais, promover prácticas éticas e responsables e dar visibilidade ao traballo destas organizacións e das persoas voluntarias. Entre o 1 e o 15 de outubro, 205 supermercados Gadis serán o punto de encontro entre a clientela e o voluntariado, cuxa presenza en tenda servirá para que compartan a súa experiencia e os seus coñecementos sobre tenencia responsable, protección animal e prevención contra o abandono.

As entidades de protección animal, protagonistas da campaña

En Gadis apoiamos a quen traballa polo benestar dos animais sen fogar. Por iso, desde 2019, Alimenta a Amizade da voz e respaldo a protectoras de Galicia e Castela e León, facilitándolles un espazo para conseguir recursos de alimentación, de hixiene e achegas económicas que lles axuden a soster a súa actividade ao longo do ano. Ademais, ofrécelles un altofalante para chegar á cidadanía e falar dos aspectos clave da protección animal.

O traballo que desempeñan estas organizacións continúa sendo imprescindible. Segundo o estudo sobre abandono e adopción El nunca o faría da Fundación Affinity, en 2025, as protectoras de España recolleron 285.720 cans e gatos, o que supón 783 animais diarios. Aínda que é certo que a sociedade está cada vez máis concienciada, as cifras continúan sendo alarmantes e segue sendo difícil dar resposta ás necesidades das entidades.

Que entidades participan en Alimenta a Amistaze 2026?

Nesta edición, participan 84 entidades de protección animal, entre refuxios, protectoras e xestoras de colonias felinas. Delas, 57 son entidades galegas e 28 castelán-leonesas. Algunhas traballan en contornas urbanas e outras en localidades rurais, pero todas comparten unha realidade: funcionan case sempre con recursos escasos e dependen da acción voluntaria.

O voluntariado, a cara visible da campaña

As persoas voluntarias destas entidades son quen da sentido á campaña. Poderás atopalas en moitos dos supermercados participantes, onde che contarán cales son as necesidades concretas da súa entidade, que animais teñen ao seu cargo e que podes facer para axudarlles. Tamén resolverán calquera dúbida que poidas ter sobre o seu labor e sobre a protección animal. Este contacto directo é fundamental para lograr que cada doazón dea resposta ás necesidades máis perentorias.

Colabora coa campaña Alimenta a Amizade

Se queres formar parte activa deste compromiso co benestar animal, podes facer a túa doazón en calquera dos 205 supermercados Gadis de Galicia e Castela e León participantes. Para iso haberá espazos habilitados no propio supermercado nos que poderás:

• Doar produtos de alimentación ou hixiene.
• Facer unha achega económica ao pasar por caixa.
• Achegarte ao voluntariado para coñecer o seu traballo e as súas necesidades.

O impacto positivo de Alimenta a Amizade

Tras oito anos de campañas, seguimos co mesmo obxectivo: que ás protectoras non lles falte o esencial. En Gadis sabemos que cada quilo e cada euro conta. Desde 2019, grazas á solidariedade da nosa clientela, recadamos máis de 473.000 quilos de produtos e máis de 59.000 €, que se distribuíron entre as entidades participantes.

O benestar animal depende dos esforzos de multitude de persoas, organizacións, empresas, e sobre todo, do compromiso de quen adica o seu tempo para coidar dos animais sen fogar. Se queres colaborar e dotar de recursos ás protectoras de Galicia e Castela e León, animámoste a facer a túa doazón entre o 1 e o 15 de outubro de 2026 en calquera dos supermercados que participan. A túa achega é importante.

Coa campaña Alimenta a Amizade traballamos para a consecución das metas dos ODS 3. Saúde e benestar, ODS 11. Cidades e comunidades sostibles e ODS 17. Alianzas para lograr obxectivos.