Muller rural: tradición, calidade e innovación

O 15 de outubro conmemórase o Día Internacional das Mulleres Rurais, unha data establecida pola Asemblea Xeral das Nacións Unidas para recoñecer o papel das mulleres no desenvolvemento agrícola e rural, a mellora da seguridade alimentaria e a erradicación da pobreza. Ademais, este 2026 foi proclamado Ano Internacional da Muller Agricultora coa intención de visibilizar o papel esencial que as mulleres desempeñan nos sistemas agroalimentarios —desde a produción ata o comercio—, ao que non se lle adoita conceder ningún recoñecemento. Desta forma, preténdese impulsar políticas e investimentos que empoderen ás mulleres nos sistemas agroalimentarios e abordar obstáculos como o acceso á terra, o financiamento, os servizos técnicos e a educación. Empoderar ás mulleres rurais mediante intervencións de desenvolvemento específicas podería aumentar os ingresos de 58 millóns de persoas.

Por quinto ano consecutivo, en Gadis volvemos situar ás mulleres rurais en primeira liña, achegando as experiencias das nosas provedoras locais a un público máis amplo a través do noso foro Mulleres rurais e das pezas audiovisuais que preparamos para a campaña. A Fundación Juana de Vega acolleu de novo este 15 de outubro o encontro cuxo lema “Tradición, calidade e innovación” reflicte o noso compromiso por fomentar o emprendemento feminino para garantir o futuro e a sustentabilidade da contorna rural.

Mulleres rurais: tradición, calidade e innovación

O lema desta edición representa algúns dos piares fundamentais das achegas que realizan as mulleres aos sistemas agroalimentarios e ás contornas rurais. A tradición fai referencia ao papel que desempeñaron as mulleres na conservación e transmisión de coñecementos, oficios e prácticas agrarias que constitúen un patrimonio cultural imprescindible. A calidade reflicte o rigor profesional co que xestionan explotacións, empresas e proxectos, así como o seu compromiso coa excelencia dos produtos, as materias primas e coa sustentabilidade. Por último, a innovación pon de manifesto a súa capacidade de liderado e de adaptación, con proxectos de emprendemento que son punteiros no contexto agroalimentario e que contribúen ao desenvolvemento económico e á fixación de poboación no medio rural.

O evento Mulleres rurais desenvólvese nun formato mixto que combina a campaña audiovisual que recolle as entrevistas a catro provedoras de Gadis e un foro que ofrece un espazo para conversar, reflexionar e compartir vivencias con elas como protagonistas. A xornada, que se puido seguir tamén por streaming, converteuse nun punto de encontro e aprendizaxe para profesionais da industria e empresas provedoras de Gadis.

A apertura do foro correu a cargo da directora de Marketing e RSC de GADISA, Melisa Pagliaro, quen destacou que o rural galego, máis aló de conservar tradicións, está a construír futuro coa súa aposta pola tecnoloxía e o desenvolvemento de novos produtos, e, detrás destes proxectos, hai mulleres tomando decisións e emprendendo para demostrar que tradición e innovación non son conceptos opostos.

Durante o encontro profundouse na modernización, a competitividade e a innovación en sectores crave de Galicia a través dos testemuños directos das emprendedoras que compartiron as súas experiencias nesta edición.

No sector lácteo, Susana Díaz, fundadora do obradoiro artesanal Kalekói e primeira das protagonistas da nosa campaña en subir ao escenario, quixo resaltar a importancia que supuxo a súa entrada en Gadis, xa que lles dotou da estabilidade que necesitaban para poder investir no crecemento da produción, creando, así, novos postos de traballo.

Na transformación de queixos, Carmen Vázquez, copropietaria de Queinaga, unha explotación leiteira familiar, compartiu a traxectoria da súa empresa desde que, en 1995, apostaron pola transformación para revalorizar a explotación. Na actualidade, contan con 17 persoas traballadoras das cales 13 son mulleres, que contribúen con orgullo á tradición e á fama dos queixos de Curtis.

No emprendemento agrícola, Noelia Dourado de Horta da Santa relatou o xiro que supuxo na súa traxectoria vital arrincar desde cero a explotación agrícola que hoxe fornece produtos como pementos, cebolas ou tomates aos nosos establecementos. Na súa intervención destacou o compromiso de Gadis coa confianza.

Para terminar, Jaime Calvo, adxunto de Dirección de Compras de Produto Fresco de GADISA, quixo destacar a aposta pioneira de Gadis polos provedores e provedoras de proximidade e o noso firme compromiso de seguir avanzando xunto aos máis de 1.000 provedores e provedoras de quilómetro 0, sinalando que entendemos os seus produtos como un factor diferencial dos nosos supermercados.

O impacto positivo de “Mulleres rurais” de Gadis

O proxecto Mulleres rurais ocupa un lugar central na estratexia de Responsabilidade Social Corporativa de Gadis porque reflicte o vínculo que construímos coas nosas provedoras de produto local. O seu traballo é crucial no tecido produtivo de Galicia e Castela e León, onde lideran explotacións, cooperativas e pequenas empresas agroalimentarias, sosteñen a actividade económica, asumen boa parte dos coidados familiares e contribúen a fixar poboación nestes territorios. Con todo, ese labor permaneceu nun segundo plano durante demasiado tempo, sen o recoñecemento que corresponde á súa achega social, económica e cultural. Por iso, desde Gadis seguimos apostando por facilitar un espazo no que poidan compartir a súa experiencia, visibilizar os retos que afrontan e reivindicar o seu papel como axentes crave do desenvolvemento rural.



Ademais, grazas a esta iniciativa achegamos á consecución das metas dos ODS 5. Igualdade de xénero, ODS 8. Traballo decente e crecemento económico, ODS 10. Redución das desigualdades e ao ODS 12. Produción e un consumo responsable.