Gadis pola biodiversidade

O pasado 2 de febreiro celebrouse o Día Mundial dos Humidais, no que se conmemora a data da firma do Convenio de Ramsar, relativo á conservación destes ecosistemas, e co que se pretende visibilizar e concienciar sobre a importancia dos humidais para a supervivencia do planeta. Os humidais son considerados un dos ecosistemas máis produtivos do mundo. Funcionan como centros de biodiversidade dos que dependen numerosas especies de plantas e animais. Por outra banda, son esenciais para a subministración de auga e para a produción primaria. O lema elixido para a celebración deste ano “Protexer e restaurar os humidais para o noso futuro común” subliña a urxencia da posta en marcha de accións concretas para protexer e restaurar estes hábitats naturais, así como do establecemento de colaboracións e de medidas de previsión para garantir que as próximas xeracións poidan seguir beneficiándose dos seus servizos.

Gadis mantén un compromiso firme coa contorna e co benestar da sociedade, que se materializa na nosa actividade empresarial e tamén co desenvolvemento do noso plan de RSC, aliñado cos ODS. Os nosos esforzos súmanse á protección e dinamización das contornas naturais a través de diversas iniciativas que buscan protexer a biodiversidade. Entre elas, atópase a colaboración que mantemos co GDR Mariñas – Betanzos, responsable da conservación dos recursos naturais da zona na que se sitúa a Reserva da Biosfera máis grande da provincia da Coruña, que supón case o 15% do seu territorio e conta con varios humidais.

A protección dos humidais para conservar a biodiversidade

Os humidais son ecosistemas esenciais que abarcan augas doces, mariñas e costeiras, cubrindo só o 6% da superficie terrestre pero albergando o 40% de todas as especies de plantas e animais. Proporcionan auga limpa, alimentos, materias primas e recursos xenéticos, sendo vitais para moitas comunidades. Ademais, contribúen a mitigar o cambio climático e a reducir os efectos de desastres naturais, polo que a súa conservación é fundamental para manter a biodiversidade.

Nos últimos 50 anos, os humidais sufriron unha deterioración do 35%, cunha taxa de desaparición tres veces maior que a dos bosques, impulsada polo crecemento poboacional, o consumo insostible, o avance tecnolóxico e o cambio climático. A Convención de Ramsar, que conta co compromiso de case o 90% dos Estados membros da ONU, busca combater este dano establecendo un marco para a conservación e uso sostible dos humidais. Os países asinantes comprométense a preservar estes ecosistemas e os seus recursos. Nesta liña, o GDR Mariñas – Betanzos deseñou un plan de conservación da biodiversidade na rexión de Mariñas Coruñesas e Terras do Mandeo.

O proxecto Conectando Biodiversidade do GDR Mariñas – Betanzos

A Reserva da Biosfera Mariñas Coruñesas e Terras do Mandeo, declarada no ano 2013 pola UNESCO, abarca un total de 116.724 hectáreas, das cales 2.754,6 son mariñas. Trátase da segunda Reserva da Biosfera galega por superficie e a primeira da provincia da Coruña. Un dos principais obxectivos do seu plan de xestión é reducir a perda de biodiversidade (paisaxes, hábitats e especies), fomentando a conservación dos compoñentes e recursos naturais silvestres, así como cultivárelos e variedades tradicionais, entre os que se atopan humidais.

Entre as súas iniciativas para promover a conservación da contorna, puxeron en marcha un proxecto de cooperación coa Asociación Seitura 22 e a Fundación Enxeñería Agronómica para o Desenvolvemento de Galicia denominado Conectando Biodiversidade. Con el, pretendían desenvolver actuacións de mellora ambiental para resolver problemas comúns, promover a innovación e implementar medidas de protección e restauración dos hábitats e especies ameazadas. Entre as actuacións que levaron a cabo, destacan:

• Restauración de infraestruturas abandonadas, como refuxios de fauna, mellora da biodiversidade e nas explotacións agrarias, retirada e control de especies invasoras.
• Identificación de accións para a mellora da infraestrutura verde e a conectividade ecolóxica.
• Información e comunicación sobre o proxecto para visibilizar os beneficios da protección da biodiversidade para a sociedade.

A colaboración de Gadis co GDR Mariñas – Betanzos

Os Grupos de Desenvolvemento Rural actúan como dinamizadores nas súas comunidades, e Gadis colabora con eles para mellorar a calidade de vida local a través da valorización do territorio. Un exemplo desta colaboración é o proxecto Ecocomedores, promovido polo GDR Mariñas – Betanzos, que busca fomentar a alimentación saudable na infancia e promover o consumo responsable e a produción sostible. Este proxecto incentiva o uso de produtos autóctonos de circuítos curtos, o que axuda a reducir a pegada ecolóxica e a protexer a biodiversidade.

O impacto positivo da conservación da biodiversidade

A biodiversidade é esencial para aproveitar os servizos que nos brindan os ecosistemas e que poden ser de tres tipos: abastecemento (alimentos, recursos, medicinas etc.), regulación (control do clima, prevención de enfermidades, xestión de nutrientes e auga etc.), e culturais ou inmateriais (valor estético e paisaxístico, benestar, crenzas etc.). Por iso, o impacto positivo da súa conservación afecta o benestar das persoas en moitos niveis e está vinculado á consecución dos ODS 2, 3, 6, 13, 14 e 15.