Pastel de cenoria con piña sinxelo e refrescante

Sempre da man dalgúns consellos saudables, hoxe en Gadis queremos explicarche como preparar un pastel de cenoria e piña sen excesivo traballo. E é que, entre a suculenta piña e as cintas de cenoria de cor brillante, esta torta de aspecto tropical será a sobremesa perfecta de calquera comida ou cea!

Primeiro, no lugar de usar estritamente fariña clásica, para este pastel combinaremos metade e metade, para engadir tamén de trigo integral. Esta aporta algúns deses nutrientes saudables recomendados, como fibra e proteína.

Esta receita usa algo de azucre moreno, pero nada máis ca iso, porque xa colle o doce que se atopa nas latas de piña.

Receita de pastel de cenoria con piña moi sinxela

Antes de nada, debes ter a man os seguintes ingredientes:

• ½ cunca de fariña normal.
• ½ cunca de fariña de trigo integral.
• 2 culleradas pequenas de polvo para forno.
• 1 culler pequena de xenxibre moído.
• 1 culler pequena de canela moída.
• ½ culler pequena de bicarbonato de sodio.
• ½ e ¼ culler de sal.
• 2 cuncas e ½ de cenorias finamente raiadas.
• 3 ovos, lixeiramente batidos.
• 1 lata de 225 gramos de piña (que debes triturar).
• ¾ cuncas de azucre moreno.
• ½ cunca de aceite vexetal.
• 225 gramos de queixo crema baixo en graxa.
• Cintas finas de cenoria e anacos de piña fresca (opcional).

Vale, agora xa podemos comezar e facémolo quentando o forno a 175 grados. Mentres, engraxa dous moldes para pasteis redondos duns 20 centímetros e forra os fondos con papel.

Nunha cunca grande, mestura as fariñas, o polvo de forno, o xenxibre, a canela, o bicarbonato de sodio e ½ culler de sal. Nunha cunca mediana, combina as cenorias, os ovos, a piña, o azucre e o aceite.

Despois, agrega a mestura de ovo e a de fariña e remove ben. A continuación, divide a masa de forma uniforme nas dúas bandexas.

Deixa no forno durante 25 minutos ou até que un escarvadentes cravado preto do centro saia limpo. Deixa que se arrefríe uns 10 minutos, retirando o papel.

Para a parte cremosa, nunha cunca mediana, bate o queixo crema e ¼ culler de sal até que estea suave e esponxoso.

Agora, coloca unha das capas do pastel nun prato, despois a metade da crema, despois a segunda capa do pastel e para rematar a crema restante. Cubre todo e deixa que arrefríe unhas 2 horas máis. Antes de servir, podes engadir toros de cenoria e/ou cintas de piña.