PRODUTO LOCAL E ALIMENTACIÓN SAUDABLE NA FEIRA INTERNACIONAL ABANCA SEMANA VERDE DE GALICIA 2026

Participamos un ano máis na Feira Internacional Abanca Semana Verde de Galicia, que se celebra no recinto feiral de Silleda ata este domingo, 7 de xuño, cun programa de actividades para todos os públicos centrado na alimentación saudable, o consumo responsable e o produto de proximidade.

No noso espazo presentamos un completo programa de showcookings, obradoiros infantís e actividades informativas, co que reforzamos o noso compromiso coa divulgación de hábitos de vida saudables e o apoio aos nosos produtores locais.

Showcookings con produto local

Organizamos showcookings coa participación das creadoras gastronómicas galegas Lola Crespo (Ñamlicioso / Frambuesa y Caramelo) e Carmen Albo (Guisándome la vida), que elaboran receitas sinxelas, creativas e con ingredientes de proximidade.

Cada sesión, de 45 minutos e cun aforo limitado a 28 persoas, inclúe degustación de pratos, material con receitas e explicacións sobre a orixe dos produtos empregados.

Entre as propostas gastronómicas destacan o salpicón de polbo, os tacos de lagostinos con mango e aguacate, os xeados flash de chocolate ou as papas aliñadas, entre outras elaboracións.

Educación alimentaria para os máis pequenos

Desenvolvemos o obradoiro infantil “Alimentes – Saúde e sostibilidade cos peques”, dirixido a nenos e nenas de entre 6 e 11 anos.

A través de actividades lúdicas e educativas, os participantes aprenden os principios dunha alimentación equilibrada baseada no “Plato Alimentes”, inspirado no modelo de Harvard, así como conceptos de consumo responsable e vida activa. Ao rematar, reciben material didáctico e un agasallo.

Premios e actividades no noso stand

Contamos tamén cun punto de información onde os visitantes poden coñecer as vantaxes da APP Gadis+, o programa Bebé Gadis e outras iniciativas como “Compartimos as receitas”, un certame que invita a recuperar receitas tradicionais transmitidas de xeración en xeración.

Ademais, incorporamos a xa tradicional ruleta de premios, un elemento emblemático da nosa presenza na feira, no que os visitantes poden participar e obter diferentes agasallos.