LANZAMOS UNHA NOVA EDICIÓN DA CAMPAÑA “ALIMENTA LA AMISTAD”

Poñemos en marcha a 8ª edición de “Alimenta la amistad”, que este ano servirá para apoiar a 85 protectoras de animais de diferentes poboacións de Galicia e Castela e León. Esta campaña, que realizamos desde 2019, lévase a cabo en 205 supermercados. A convocatoria incorpora cada ano novas entidades e contribúe a potenciar a conciencia social polo benestar animal.

Do 1 ao 15 de outubro, nos establecementos que participan, habilitaremos puntos específicos de recollida de alimentos e produtos de hixiene para cans e gatos. Ademais, os clientes que queirades realizar unha achega económica podedes facela directamente ao pasar por caixa.

Compromiso co benestar animal

Desde o compromiso co benestar animal recollido no noso programa de Responsabilidade Social Corporativa e coincidindo co Día Mundial dos Animais que se celebra cada ano o 4 de outubro, desenvolvemos esta acción que permite visibilizar o esforzo e o labor diario, no coidado e a procura de fogar para mascotas abandonadas, das 85 protectoras e refuxios que se beneficiarán desta campaña. Estas entidades están repartidas nas provincias da Coruña, Lugo, Ourense e Pontevedra; alén de Ávila, León, Salamanca, Segovia, Palencia, Valladolid e Zamora.

Preto de medio millón de quilos de solidariedade

A coordinadora de RSC, Lucía Santos, e o director de Comunicación, José Luis Fernández Astray, acudiron a un dos puntos de venda nos que se leva a cabo a recollida e puxeron en valor a solidariedade dos nosos clientes, que nos últimos sete anos achegastes preto de medio millón de quilos de produtos á causa. Ademais, en 2025 tamén se entregaron 18.500 € en metálico.

Tamén asistiron Covadonga Fernández Herrera, directiva da Asociación Felinos Felices e José Antonio López Corral, tesoureiro de Cancoruña Asociación Canina, dúas das entidades a favor das que impulsamos esta campaña solidaria. Ambos mostraron o seu agradecemento polo noso apoio continuado, que é clave para poder seguir desenvolvendo o seu labor.