DISTRIBUÍMOS MÁIS DE 80.000 QUILOS DE PRODUTOS ENTRE 72 PROTECTORAS DE ANIMAIS

Repartimos un total de 80.727 quilos de produtos de alimentación e hixiene recollidos na 6º campaña “Alimenta la amistad”. Unha cifra récord, que supera en máis de 15.000 os quilos entregados o ano pasado ás organizacións de Galicia e Castela e León que prestan asistencia a cans e gatos sen fogar.

Desde Gadis queremos poñer en valor a solidariedade mostrada, unha vez máis, polos nosos clientes con esta acción solidaria, que se desenvolveu entre o 1 e o 13 deste mes de outubro. Tamén achegaron 3.919 € de donativo económico, aos que sumamos preto de 17.000 €, que se distribuirán entre os 72 refuxios e protectoras cos que colaboramos nesta edición.

Así mesmo, o labor dos voluntarios informando nos puntos de venda sobre a posta en marcha de “Alimenta la amistad” foi fundamental para o resultado obtido, do que se beneficiarán entidades da Coruña, Lugo, Ourense, Pontevedra; e Ávila, León, Salamanca, Segovia, Palencia, Valladolid, Zamora, provincias nas que contamos con Supermercados Gadis.

Máis de 400.000 quilos en 6 edicións

Coa posta en marcha de “Alimenta la amistad”, conectamos coa nosa contorna e recollemos a sensibilidade de miles de clientes co coidado dos animais. En seis edicións, reunimos máis de 400.000 quilos de produtos de alimentación e hixiene para cans e gatos. Esta iniciativa desenvólvese cada ano ao fío do Día Mundial dos Animais, que se conmemora o 4 de outubro.

Compromiso co benestar animal

O noso compromiso co benestar animal articúlase a través do programa de Responsabilidade Social Corporativa, no marco do que se desenvolve esta campaña.