MÁIS DE 24.000 ESTUDANTES DE 676 COLEXIOS PARTICIPAN NO NOSO PROGRAMA ALIMENTES

Desde Gadis achegamos a alimentación saudable, sostible e responsable a máis de 24.000 estudantes de Galicia e Castela e León durante este curso escolar. Este proxecto educativo, que se desenvolve desde hai máis de 25 anos, empeza nas aulas, onde se abordan diferentes aspectos relacionados entre si, como a nutrición, o consumo consciente para evitar o desperdicio de alimentos, o coidado do planeta e o valor do desenvolvemento sostible da comunidade a través da produción local. Todo o material está desenvolto por profesionais e adaptado á 2ª etapa de Educación Infantil e ao currículo oficial educativo de Primaria.

Da teoría á práctica: visitas a Gadis

Despois da primeira parte con aprendizaxe virtual, lévanse a cabo as visitas aos supermercados co obxectivo de poñer en práctica todo o aprendido no colexio. Así o destaca un dos 1.145 docentes que este curso involucráronse no proxecto: “O que máis nos gusta é que o alumnado pode aprender sobre alimentación saudable nunha situación real, participando activamente e facendo eleccións conscientes dos alimentos. Resulta moi motivador ver como relacionaban o aprendido na aula co supermercado”.

Monitores formados en nutrición e educación ambiental acompañan aos estudantes no seu percorrido polas distintas seccións dos supermercados, con maior atención ás de produto fresco: peixaría, carnizaría, froitas e verduras, lácteos etc. Aquí aprenden a identificar os alimentos máis saudables e sostibles; cales son produtos locais, de tempada e de orixe local. Aínda se poden xestionar novas visitas a través do calendario dixital que puxemos ao dispor dos docentes dos 676 centros educativos que este ano forman parte do proxecto.

Atención á diversidade e 14 unidades didácticas

O noso compromiso coa inclusión e a diversidade, que se recolle no programa de RSC, concrétase nesta iniciativa educativa coa adaptación de contidos para nenos e nenas que teñen necesidades educativas especiais. Así, tamén poden participar activamente nas aulas co percorrido virtual da plataforma seguindo a cadea de alimentos desde a orixe, visitando unha lonxa, unha horta ou unha explotación gandeira, os almacéns e as diferentes seccións dos supermercados.

En total, son 14 unidades con textos, vídeos, fichas interactivas e xogos para que a aprendizaxe resulte divertida. Hai un apartado específico co Prato Alimentes, no que se detallan as porcións e categorías adecuadas dos alimentos que hai que consumir para seguir unha dieta equilibrada segundo a recomendación do Prato de Harvard. A sustentabilidade ambiental é unha das liñas de traballo ás que se lle dá prioridade na plataforma para sensibilizar do importante que é a conservación da contorna, cunha unidade didáctica competencial sobre a compostaxe. Quen finalice este itinerario interactivo, recibirá un premio de Gadis: un kit de Prato Alimentes. Ademais, sortearemos 5 packs de tablets entre todos os centros educativos.

Alimentes é o recurso educativo de calidade que poñemos dispor da comunidade educativa e das familias desde hai máis de dúas décadas para acompañalas no proceso de fomentar un estilo de vida activo e saudable desde a infancia.