Outras formas de traballar a sustentabilidade

Cando falamos de sustentabilidade no sector da distribución alimentaria, é doado tender a pensar en cuestións como a reciclaxe, a redución de plásticos ou a eficiencia enerxética dos supermercados. Con todo, para Gadis, a sustentabilidade funciona como fío condutor de todo o modelo de negocio, atravesando de forma transversal os procesos ao longo da cadea de valor.

En Gadis articulamos o noso propósito de xerar un impacto positivo na contorna a través de tres dimensións: a social, a económica e a ambiental. Estes son os tres piares fundamentais, que se interrelacionan e se retroalimentan, sobre os que construímos a nosa actividade para alcanzar obxectivos reais con capacidade de transformación.

Desde o noso departamento de Responsabilidade Social Corporativa impulsamos unha estratexia de RSC que vai máis aló da nosa actividade económica e que fortalece a conexión coa contorna e coas persoas. Unha folla de ruta que prioriza o coidado do planeta e da súa biodiversidade, mentres fomenta unha escoita activa dos axentes dos territorios onde operamos. Neste compromiso, as alianzas son a clave que nos permite estar máis preto das comunidades e aprender de diferentes realidades.

Nesta publicación queremos compartir a nosa forma de traballar a sustentabilidade máis aló do cumprimento legal e das nosas iniciativas máis coñecidas.

Outras forma de traballar a sustentabilidade son posibles

Existen outros xeitos de xerar impacto positivo que se poden sumar a indicadores tradicionais como a redución de emisións, a optimización de procesos loxísticos ou a certificación de procesos. Ás veces a sustentabilidade tamén se mide nas alianzas que se constrúen co tecido asociativo dun territorio ou na conciencia que se esperta nas novas xeracións. Entender a sustentabilidade de forma ampla, combinando o social, o económico e o ambiental nunha mesma estratexia, permitiunos atopar fórmulas propias e demostrar que non hai un único camiño para construír un negocio máis responsable e comprometido.

Iniciativas de Gadis

Estas son algunhas das nosas iniciativas que sitúan a sustentabilidade no centro dunha forma pouco habitual pero que xeran un impacto positivo real, con capacidade de transformación:

• El Bosque Gadis. Unha iniciativa desenvolvida coa Asociación Amicos no terreo "A Galpulleira" de Curtis (A Coruña), concibida para fomentar a integración social e a conversación da biodiversidade. Persoas traballadoras das Ecobrigadas de Amicos reforestaron 300 bidueiros (especie autóctona) e habilitaron o terreo como unha aula ao aire libre, onde grupos de escolares visitan o bosque para aprender sobre diversidade e a importancia de conservar a natureza. É un exemplo de como un mesmo proxecto pode xerar emprego inclusivo, restaurar unha contorna natural e sensibilizar ás novas xeracións, xerando un impacto positivo social e ambiental.
• Campaña Día das Letras Galegas. Para conmemorar esta data, Gadis converte os seus supermercados nunha insignia da cultura galega cunha publicación inédita inspirada na obra ou na figura da persoa á que se dedica. Homenaxeamos a aquelas autoras e autores que aportaron á identidade colectiva galega porque é imprescindible entender de onde vimos para saber cara a onde imos. En 2026, repartimos 30.000 exemplares do caderno ilustrado Lenzos: as letras en cor, inspirado na obra da escritora e xornalista viguesa Begoña Caamaño. O ano anterior publicamos Foliada!, como homenaxe a Adolfina e Rosa Casás Rama, Eva Castiñeira Santos e ás Pandereteiras de Mens, nas que se personificou a poesía popular oral. Esta iniciativa exemplifica o noso compromiso coa contorna, coa memoria colectiva e co orgullo da identidade tan plural que compartimos.

• O proxecto de alimentación texturizada con ASPACE Coruña. Outra forma na que abordamos a sustentabilidade é desde a perspectiva da innovación aplicada ao benestar das persoas. Grazas á nosa alianza con ASPACE Coruña, apoiamos este proxecto pensado para mellorar a alimentación de persoas con parálise cerebral e problemas de disfaxia. Aplican un método que conserva o sabor e a aparencia dos pratos, facilitando unha experiencia alimentaria máis segura, digna e inclusiva. Trátase dunha iniciativa que demostra que a sustentabilidade social tamén pode materializarse en solucións técnicas moi concretas, pensadas para mellorar a calidade de vida da cidadanía.

O impacto positivo de traballar a sustentabilidade como concepto amplo e transversal

En Gadis traballamos para minimizar as nosas emisións e os nosos residuos, pero entendemos a sustentabilidade como un concepto amplo coa capacidade de xerar un impacto positivo multiplicador que actúa no ámbito social, o económico e o ambiental. Esa mirada transversal permite que iniciativas tan diferentes como unha reforestación de especies autóctonas, un sistema de loxística inversa, unha publicación polo Día das Letras Galegas, a implementación de placas solares nos nosos supermercados ou o convenio cunha entidade do terceiro sector respondan a un mesmo propósito: xerar un impacto positivo na contorna e nas persoas que o habitan. Traballar a sustentabilidade desta forma permítenos non depender dunha única gran acción, senón dunha estratexia composta por pequenos e grandes compromisos sostidos no tempo, o que garante un impacto máis resiliente e adaptado á realidade das persoas.

Esta mirada ampla da sustentabilidade contribúe á consecución das metas dos ODS 10. Redución das desigualdades, ODS 11. Cidades e comunidades sostibles, ODS 15. Vida de ecosistemas terrestres e o ODS 17. Alianzas para lograr obxectivos.