ODS 2: fame cero

No ano 2015 a Asemblea Xeral de Nacións Unidas aprobou por unanimidade a Axenda 2030 para o Desenvolvemento Sostible. Esta iniciativa histórica, tanto polo alcance do consenso como polas súas novas medidas, presenta un plan de acción en favor das persoas, o planeta, a prosperidade e a paz universal. Estrutúrase a través de 17 Obxectivos de Desenvolvemento Sostible (ODS) e 169 metas concretas que se deben desenvolver ata 2030. Nesta publicación falaremos dun dos Obxectivos que en Gadis consideramos prioritario, o ODS 2. fame cero.

O ODS 2 ten como obxectivo rematar coa fame no mundo en 2030. Con todo, a problemática da fame e a inseguridade alimentaria aumentou a nivel global desde 2015 debido a diferentes crises mundiais: a pandemia, os conflitos, o cambio climático, o aumento do custo da vida e o afondamento das desigualdades. En 2022, aproximadamente 735 millóns de persoas (o 9,2% da poboación mundial) atopábanse en estado de fame crónica, unha cifra crecente que revela a crise nesta materia.

Garantir a seguridade alimentaria require do compromiso de diferentes actores e dun enfoque pluridimensional e aliñado. A consecución deste Obxectivo céntrase en salvagardar os alimentos inocuos e nutritivos, en asegurar o acceso a unha alimentación nutritiva —especialmente para as infancias e os colectivos vulnerables—, en garantir a viabilidade, o traballo digno e a innovación na transformación dos sistemas alimentarios, e en investir nas comunidades rurais —claves para o desenvolvemento dun sector alimentario de proximidade, sostible a longo prazo—.

Como podes contribuír á consecución do ODS 2?

Todas as persoas temos a capacidade de contribuír á consecución do ODS 2 desde as nosas realidades. No noso día a día, apoiar a agricultura e os mercados locais, priorizar alimentos sostibles e loitar contra o desperdicio alimentario son accións clave neste proceso.

Aproximadamente, desperdíciase un terzo dos alimentos que se producen a nivel mundial, polo que realizar unha compra responsable, calcular correctamente as cantidades e almacenar de xeito adecuado a comida para consumila noutro momento son pequenas accións que teñen un gran impacto.

Para alcanzar a fame cero en 2030, é imprescindible que institucións públicas, organizacións e cidadanía traballen de xeito coordinado, dando prioridade a solucións que permitan reducir desigualdades sociais, que transformen sistemas alimentarios e mercados e que invistan en prácticas agrícolas sostibles, buscando o acceso universal a unha alimentación nutritiva.

Que facemos en Gadis?

En Gadis contribuímos ao ODS 2 a través de compromisos con diversas organizacións, tanto a nivel local como con alcance estatal e internacional.

Estas alianzas estratéxicas permítennos ofrecer recursos a persoas con difícil acceso a unha alimentación nutritiva, prestando especial atención á infancia e a persoas e familias en situación de vulnerabilidade:

● Colaboración anual con UNICEF: desde 1993 colaboramos anualmente con UNICEF para mellorar a calidade de vida das persoas, especialmente da infancia. En 2025, a nosa colaboración traduciuse nunha doazón económica para atender a 15.057 nenos e nenas de países en emerxencia a través de tratamento nutricional. Enviáronse 5.019 kits de alimento terapéutico, unha solución rica en nutrientes destinada a loitar contra a desnutrición aguda infantil en territorios e países afectados por graves crises humanitarias.

Tamén colaboramos con varias iniciativas de doazón de alimentos para as comunidades locais nos nosos supermercados de Galicia e Castela e León:

● Maio Solidario: unha das nosas accións sociais máis representativas que cumpre, este 2026, 14 edicións e que contribúe ao benestar de familias e colectivos en situación de vulnerabilidade. Trátase dunha iniciativa que activamos en colaboración con 12 bancos de alimentos de Galicia e Castela e León. En 2025, grazas á xenerosidade da nosa clientela, recadamos máis de 140.000 quilos de produtos e conseguimos unha achega económica de 67.662 €.

● A Gran Recollida: desde hai once anos, participamos nesta campaña promovida pola Federación Española de Bancos de Alimentos (FESBAL). En 2025, recadamos 220.000 quilos de alimentos e 82.331 € en 211 supermercados Gadis de Galicia e Castela e León.

Ademais, de xeito complementario, realizamos doazóns recorrentes de alimentos a diferentes Bancos de Alimentos e a entidades do terceiro sector que traballan con colectivos en situación de vulnerabilidade para garantir o acceso a unha alimentación nutritiva ás nosas comunidades locais.

O impacto positivo do compromiso de Gadis coa consecución do ODS 2

Unha alimentación nutritiva e saudable contribúe a mitigar os riscos de padecer enfermidades, salvagarda a saúde colectiva e contribúe a xerar sociedades e comunidades activas e felices. Desde Gadis, traballamos a diario para que todas as persoas poidan ter acceso a unha alimentación digna e universal, tanto a través das iniciativas citadas anteriormente como cun modelo de negocio que prioriza aos provedores e provedoras locais e que fideliza á clientela a través dunha ampla variedade de produtos saudables a prezos accesibles, incluíndo opcións de proximidade, ecolóxicas e de tempada.

Con estas iniciativas e a nosa estratexia de negocio, contribuímos á consecución do ODS 2. Fame cero. De xeito complementario, axudamos a alcanzar as metas expostas polo ODS 17. Alianzas para lograr obxectivos, xa que as persoas e entidades colaboradoras ocupan un papel protagonista no noso impacto positivo.