O noso compromiso sostible 2024

Hai uns días publicamos a Memoria corporativa Gadisa Retail 2024, un documento informativo que recolle os principais fitos da nosa actividade durante o exercicio de 2024, así como o impacto das nosas accións a través de indicadores económicos, ambientais e sociais. Este documento é importante porque nos permite exercer as nosas obrigacións en materia de transparencia, información pública e bo goberno, mentres que nos achega aos nosos grupos de interese a través dunha análise detallada dos nosos compromisos, valores e acordos.

A nosa sétima posición no último informe Merco Responsabilidade ESG España 2024, que visibiliza o traballo das empresas do noso sector que son máis responsables en termos de ESG (Enviromental, Social and Governance), avala o noso impacto ambiental, o compromiso coas persoas traballadoras, a clientela e a sociedade, así como as estratexias a nivel ético e de goberno corporativo.

En Gadis apostamos por unha resposta local aos retos globais, asumindo os compromisos do Pacto Mundial das Nacións Unidas e os Obxectivos de Desenvolvemento Sostible de forma transversal en todas as áreas de negocio. Nesta publicación compartimos os fitos máis destacables de 2024.

O noso impacto económico positivo en 2024

O impacto económico alcanzado en 2024 evidencia a nosa intención de xerar un valor compartido, contribuír ás economías locais a curto e longo prazo. Resultados económicos principais:

• Facturamos 1.640 millóns de euros en 2024, dos cales 714,71 millóns foron fondos propios.
• Contribuímos ao gasto público con 160,21 millóns de euros, 54,22 millóns son cotizacións sociais e 105,99 millóns impostos e tributos.
• Investimos 24,94 millóns de euros para a apertura de novos establecementos e a mellora de supermercados e centros loxísticos.
• Xeramos 322 novos postos de traballo, alcanzando un persoal total de 8.880 persoas traballadoras.
• Contamos con 2.417 provedores locais, 980 son do sector da alimentación.

Promovemos os nosos valores éticos tamén entre provedores e colaboradores externos a través do noso Código Ético e da nosa Estratexia de Responsabilidade Social Corporativa, garantindo que o noso modelo de xestión e o noso vínculo cos grupos de interese estea baseado na transparencia, a responsabilidade e o cumprimento ético.

O noso impacto social positivo en 2024

En Gadis somos 100x100 locais e por iso comprometémonos coas comunidades nas que operamos. Xeramos valor engadido e colaboramos con iniciativas afíns á nosa misión. Algunhas das nosas iniciativas sociais de 2024 son:

• Promovemos estilo de vida e alimentación saudable: a través do noso programa educativo Alimentes Dixital, no que participaron 28.501 escolares de Galicia e Castela e León, e colaboración coa Asociación de Celíacos de Galicia (ACEGA).
• Apoio á xente nova e familias: a través descontos co carné familiar, Bebé GADIS e o “Carné Xove” da Xunta de Galicia.
• Impulsamos iniciativas solidarias: foro “GADIS coas ONG”, distribuímos 80.727 quilos de produtos entre 72 protectoras de animais en “Alimenta a Amizade”, doamos 45.000€ nos últimos 3 anos en “La Compra de tu Vida”, apoiamos a Aspace con 88.000 menús anuais e 35.000 menús elaborados co método de alimentación texturizada.
• Promovemos campañas de doazón de alimentos: en 2024 batemos récord de doazóns en Maio Solidario con 150.000 kg de alimentos e 49.873 € e en “La Gran Recogida” de FESBAL 96.000 euros e 233.000 quilos de alimentos.
• Apoiamos máis de 1.700 eventos culturais, musicais, deportivos e de desenvolvemento local.
• A nosa comunidade dixital crece: compartimos comunidade con 63.833 persoas en Instagram, 192.931 en Facebook e 16.302 en Youtube.

O noso impacto ambiental positivo en 2024

Comprometémonos co planeta e implementamos estratexias que nos permitan minimizar o noso impacto negativo no medio ambiente, fomentando a economía circular como piar fundamental na nosa estratexia de sustentabilidade. Algunhas das accións que implementamos en 2024:

• Renovamos o prestixioso selo internacional “De residuos a recursos: zero a vertedoiro” que valida o noso sistema de revalorización de residuos co que conseguimos dar unha nova vida útil a aproximadamente o 98% dos residuos xerados en 2024.
• Capacidade loxística e eficiencia operativa: implantamos un control integral de distribución que permite optimizar e axilizar os desprazamentos cunha frota de máis de 240 vehículos, 2 centros loxísticos e 2 plataformas de compra e distribución de peixe.
• Loxística inversa: co noso sistema interno de clasificación e reciclaxe de envases e embalaxes en 2024 reciclamos 9.109 toneladas de residuos, reintroduciéndolos na cadea de valor.
• Envases reutilizables: utilizamos caixas reutilizables para enviar a mercadoría, incrementando un 62% as cifras do ano anterior ata alcanzar os 7,78 millóns de movementos en 2024.
• Continuamos a nosa colaboración coa Alianza Galega polo Clima.
• Implementamos medidas para mitigar o cambio climático e conseguir a eficiencia enerxética: tecnoloxías de autoconsumo e instalacións fotovoltáicas, luminarias LED, mellora do illamento térmico e acústico dos centros…
• Ofrecemos alternativas de consumo sostible: opcións a granel, compra directa en mostrador, variedade de envases sostibles (bolsas de papel reciclado, biodegradables e reciclables), descontos en produtos próximos á data de consumo preferente e doazóns de produto para evitar o desperdicio alimentario.

A publicación da Memoria corporativa de 2024 é un exercicio de transparencia e honestidade, que abre un foco á nosa estratexia de negocio interna e pon en valor a todas as partes que sosteñen Gadis. Este ano foi de récord en cifras e tamén de impacto, na nosa estratexia a futuro, queremos seguir crecendo de forma sostible e desde o local, acompañando ás comunidades que nos rodean.