Nutrición e seguridade alimentaria, dúas caras dunha mesma moeda

O 28 de maio conmemórase o Día Nacional da Nutrición, unha data impulsada pola FESNAD (Federación Española de Sociedades de Nutrición, Alimentación e Dietética) para sensibilizar á poboación sobre a importancia de manter unha dieta saudable e equilibrada para previr enfermidades e coidar o benestar humano. De acordo coa Organización Mundial da Saúde (OMS), a alimentación saudable pode adoptar moitas formas pero sempre debe basearse en catro principios fundamentais: adecuación, equilibrio, moderación e diversidade.

A esta celebración, súmase o próximo 7 de xuño a do Día Mundial da Inocuidade dos Alimentos, instaurada pola Organización das Nacións Unidas para a Alimentación e a Agricultura (FAO polas súas siglas en inglés), cuxo lema este ano é “Da carga ás solucións: alimentos inocuos en todas partes”. A seguridade alimentaria conséguese cando as persoas teñen acceso a alimentos suficientes, seguros e nutritivos para o seu crecemento, desenvolvemento e unha vida activa e saudable. Para asegurala, é necesaria a implementación de boas prácticas en todas as etapas da cadea alimentaria, desde a produción ata o consumo.

A inocuidade (ou salubridade) dos alimentos e a nutrición son indisociables e representan dúas caras da mesma moeda. Garantir o acceso a alimentos inocuos e nutritivos en cantidades suficientes é fundamental para manter a vida e promover a saúde a nivel mundial.

Nutrición e seguridade alimentaria en Gadis

En Gadis, a promoción dunha alimentación saudable e velar pola seguridade alimentaria son elementos prioritarios no noso modelo de negocio. O noso compromiso co fomento da alimentación saudable reflíctese en diferentes iniciativas e na oferta ampla e variada de produtos frescos de calidade, de proximidade, de orixe ecolóxica e que atenden a diferentes necesidades alimentarias.

Por outra banda, a seguridade alimentaria é unha parte fundamental dos nosos procesos, especialmente da nosa estratexia de distribución e cadea loxística. En Gadis, aplicamos rigorosos sistemas de control de calidade en cada unha das fases:

• O control de temperatura e a cadea de frío son piares fundamentais dunha distribución segura. Isto afecta especialmente a produtos frescos como lácteos, carnes, peixes ou vexetais, polas súas necesidades específicas de distribución.
• A selección axeitada de envases e embalaxes para asegurar que actúan como escudos protectores dos alimentos e distribuír os produtos en condicións seguras. Para iso, utilizamos técnicas de envasado ao baleiro, atmosferas modificadas ou envases herméticos, para reducir a oxidación e a humidade, dúas dos principais inimigos da conservación nutricional.
• A rastrexabilidade e os controis de calidade son dúas das medidas máis importantes na industria alimentaria. Os sistemas de rastrexabilidade permiten acompañar o percorrido dos produtos desde a orixe ata a persoa consumidora final. Isto garante os estándares de seguridade e o protocolo de actuación en caso de detectar algunha anomalía no proceso.
• Optimización do transporte a través dun sistema loxístico eficaz e sostible co obxectivo de, por unha banda, reducir o impacto ambiental e, por outra, minimizar os tempos de tránsito dos alimentos frescos. A optimización dos roteiros e a elección de provedores e provedoras de proximidade permítennos ser grandes aliados da nutrición. Ademais, contamos con dous centros loxísticos principais en Betanzos e Medina del Campo para produtos frescos, perecedoiros e non perecedoiros. No caso dos produtos frescos do mar, temos plataformas loxísticas directamente nas lonxas da Coruña e Vigo e un establecemento para a redistribución en Valladolid.

Unha vez que os alimentos chegan aos fogares, son as persoas consumidoras as que teñen que continuar ese proceso, implementando estratexias de almacenamento e conservación axeitadas para garantir a seguridade e inocuidade dos produtos. Estas medidas varían en función do tipo de alimento, da estación do ano (especialmente coa diferenza de temperaturas), a localización e a data aproximada de consumo do produto. Por exemplo, os produtos lácteos, como leites, queixos ou iogures, necesitan ser refrixerados a temperaturas inferiores a 4 °C para evitar a proliferación bacteriana. As carnes crúas almacénanse mellor na parte inferior da neveira para previr contaminación cruzada con outros alimentos. É recomendable conservar en recipientes herméticos os produtos secos como legumes, arroz ou pasta, para protexelos da humidade e a luz directa. A aplicación sistemática deste tipo de prácticas non só prolonga a vida útil dos alimentos, senón que tamén reduce significativamente o desperdicio alimentario e o risco de alteracións na inocuidade dos produtos.

O impacto positivo de priorizar a nutrición e a seguridade alimentaria

Comprometerse cunha alimentación nutritiva e con prácticas de seguridade alimentaria non son obxectivos separados, senón unha praxe necesaria para garantir un investimento directo en saúde, en benestar e na calidade de vida das persoas. Coidar o que comemos é clave para unha alimentación saudable e nutritiva, pero coidar de que forma chega ás nosas mesas é unha responsabilidade para asegurar o benestar das nosas comunidades.

En Gadis, sabemos que o traballo para garantir a nutrición e a seguridade alimentaria non comeza nos nosos supermercados, senón moito antes: na selección rigorosa de provedores e provedoras, na correcta cadea de frío e no noso sistema de loxística eficaz e sostible. Desta forma, contribuímos activamente á consecución dos ODS 2. Fame cero, ao ODS 3. Saúde e benestar e ao ODS 12. Produción e consumo responsables.