Guía de froitas e verduras de tempada para o verán

A natureza ten o seu propio ritmo e en cada estación bríndanos alimentos que responden tanto ás necesidades do noso corpo como ás condicións climáticas da contorna. Por iso, os alimentos de tempada constitúen unha peza clave nunha alimentación equilibrada, saudable e sostible.

Respectar os ritmos de maduración de froitas e verduras e consumilas no seu punto óptimo, alén de ofrecer unha maior achega de nutrientes, garante un sabor máis intenso e saboroso. Por outra banda, os alimentos de tempada tenden a ser de orixe local, o que xera un dobre impacto positivo na economía local e na contorna. O seu proceso de produción e distribución respecta o planeta, con menor necesidade de aditivos e substancias artificiais e reducindo a pegada de carbono ao minimizar os desprazamentos.

Un prato colorido é sinónimo de coidar a nosa saúde e benestar. Os fitonutrientes —responsables da pigmentación e o sabor de froitas e verduras— son substancias químicas naturais cuxa función biolóxica é protexer a estes alimentos de xermes, fungos e outras ameazas externas. Existen miles de fitonutrientes distintos, clasificados en diversos grupos segundo as súas propiedades e beneficios específicos. A súa achega é importante, xa que contribúen a mellorar a función inmunitaria, axudan a reducir procesos inflamatorios e actúan como un mecanismo natural de prevención fronte a enfermidades crónicas. Por iso, manter unha dieta rica en produtos vexetais e variada en cores non só enriquece as nosas comidas, senón que tamén fortalece o sistema inmunolóxico e contribúe de forma directa ao noso benestar.

Nesta publicación repasamos as principais froitas e verduras da tempada de verán e compartimos algúns consellos de como preparalas para aproveitar os seus nutrientes e calidades ao máximo.

Froitas e verduras de verán

Coa chegada das altas temperaturas, é habitual priorizar o consumo de produtos frescos —a miúdo crús— e con alto contido en auga e vitaminas, perfectos para manter a hidratación e a enerxía ao longo do día. Se, ademais, optamos por produtos vexetais de tempada e de orixe local, asegurámonos unha dieta saudable, equilibrada e óptima para a consecución dos nutrientes, minerais e vitaminas que necesitamos nesta época do ano.

En Gadis, temos un calendario coas froitas e verduras de tempada para facilitar a experiencia de compra á nosa clientela. Tamén podes consultar neste apartado da nosa web o calendario das froitas e verduras máis populares na nosa sección de produtos frescos.

Que froitas debo consumir na tempada de verán?

No verán aparecen na nosa froitería as grandes protagonistas desta tempada: a sandía e o melón. Son unha opción perfecta para comer e compartir na praia ou na piscina grazas ao seu alto contido en auga, que contribúe á hidratación e achegan unha sensación de frescura.

A néspera, o albaricoque, a nectarina, o pexego, a ameixa e o paraguaio son algunhas das froitas de óso máis características desta época. Os seus sabores intensos e cores rechamantes trasládannos directamente aos meses de verán. O figo tamén é unha froita estival, que ten un calendario de produción limitado e está moi demandado polo seu sabor doce, ofrecendo distintas posibilidades de consumo: ao natural, como sobremesa combinada con queixo estilo camembert ou en marmelada.



Cales son as verduras de tempada entre xuño e setembro?

As verduras adoitan ter calendarios de tempada máis amplos que as froitas e, nalgúns casos, poden colleitarse practicamente durante todo o ano. Pero é verdade que, durante os meses de verán, a horta produce en abundancia grazas á chegada das altas temperaturas tras a tempada de choivas.

Nestes meses podemos consumir verduras como a cenoria, o cogombro, o nabo, a berenxena ou as xudías verdes. Cara ao final do verán, a partir sobre todo do mes de setembro, iníciase a tempada de espinacas, repolo, allo porro ou pementos.

Unha das hortalizas máis presentes durante o verán é o tomate, que, a pesar de que podes atopalos na sección de froitería ao longo de todo o ano, alcanzan un sabor incomparable nesta época. É un ingrediente moi versátil na cociña e está presente en ensaladas, salsas e mesmo en pratos de culler típicos do verán como o gazpacho ou o salmorejo.

O impacto positivo do consumo de froitas e verduras de tempada

Comer un prato colorido, con variedade de froitas e verduras de tempada no verán, achégannos os nutrientes, vitaminas, minerais e antioxidantes necesarios. Manter unha dieta equilibrada e saudable durante estes meses é imprescindible para dotar ao noso corpo de enerxía e un bo nivel de hidratación.

Apostar por produtos de tempada na nosa alimentación é sinónimo para comer produtos de proximidade, unha opción sostible que contribúe a dinamizar a economía e o emprego local á vez que minimiza o impacto negativo no medio ambiente. Deste xeito, coidamos a nosa saúde e benestar mentres contribuímos á consecución das metas dos ODS 3. Saúde e benestar, ODS 12. Produción e consumo responsables e ODS 13. Acción polo clima.