Gadis co Día mundial do medio ambiente

O 5 de xuño celébrase o Día mundial do medio ambiente, unha conmemoración que busca concienciar sobre a fraxilidade do noso planeta e dos seus recursos naturais. Baixo o lema «As nosas terras. O noso futuro. Somos a #XeraciónRestauración.», esta edición centrouse na restauración das terras, a loita contra a desertificación e o fortalecemento fronte á seca. De acordo cos datos da Convención das Nacións Unidas de Loita contra a Desertificación, ao redor do 40% das zonas terrestres do planeta están degradadas e os períodos de seca alongáronse e aumentaron un 29% desde o ano 2000. Unhas cifras que nos colocan ante unha situación de emerxencia, que require de medidas urxentes para reducir á metade as emisións anuais de gases de efecto invernadoiro e controlar a xeración de residuos, especialmente dos plásticos.

Para contribuír á consecución destes obxectivos, a estratexia ambiental de Gadis sostense en catro piares fundamentais: a xestión responsable dos recursos e residuos en toda a cadea de valor, a loxística inversa, o apoio á produción de proximidade e a eficiencia enerxética. Con motivo desta celebración, realizamos o balance estratéxico e constatamos unha mellora nos nosos datos de reciclaxe e reutilización de residuos. En 2023, puxemos de novo en circulación 10.000 toneladas de cartón, madeira e plástico a través de diferentes sistemas de valorización e proxectos de economía circular.

Que fai Gadis para protexer o medio ambiente?

Dentro dos catro vértices da nosa estratexia ambiental, deseñamos distintas liñas de actuación dirixidas a optimizar o aproveitamento de recursos, a eficiencia loxística, os roteiros de transporte e as fontes enerxéticas:

- Reducir, reutilizar e reciclar. Promovemos as tres R como parte da nosa cultura corporativa. Na actualidade, damos unha nova utilidade a máis do 95% dos residuos que xeramos e levanse a cabo ao redor de 4,8 millóns de movementos de caixas de plástico e outros envases reutilizables. Ademais, transformamos parte do cartón reciclado en caixas para os envíos dos pedidos a domicilio.

- Atención persoalizada para promover o consumo responsable. É unha ferramenta de gran utilidade para favorecer a redución do uso de envoltorios e envases e impulsar a compra e o consumo responsable, axudando a minimizar o desperdicio alimentario. A venda a granel permite que a cantidade de produtos se axuste ás necesidades da clientela e dos seus fogares. A isto únese o programa “A-proveito”, que consiste na redución substancial do prezo daqueles produtos cuxa data de consumo preferente estea próxima ao seu vencemento.

- Bolsas biodegradables. As bolsas que Gadis pon ao dispor da súa clientela nas seccións de produto fresco están fabricadas a partir da fécula da pataca, se desintegran nun período inferior a 180 días sen efectos contaminantes e o seu modelo de produción está baseado na economía circular porque se converten en abono para a agricultura biolóxica mediante un proceso de compostaxe.

- Medidas para axudar á clientela a reciclar. Favorecemos a valorización de residuos xerados nos seus fogares, poñendo á súa disposición puntos de recollida de pilas domésticas ou restos de aparellos electrónicos, que se entregan a xestores autorizados para a reciclaxe do 100% dos seus compoñentes. Nalgunhas tendas tamén se recollen cápsulas de café e habilitáronse illas de reciclaxe.

- Produción sostible e de proximidade. Xeramos riqueza socioeconómica na contorna a través das compras a máis de 2.000 provedores e provedoras de orixe local, priorizando a produción máis sostible e de proximidade. Ademais, nos supermercados, incentívase o consumo de produtos frescos e de tempada. Estas medidas reducen a pegada ambiental e fortalecen a eficacia do sistema loxístico, optimizando os roteiros e garantindo a rastrexabilidade.

- Máxima eficiencia enerxética. As reformas dos supermercados e as novas construcións lévanse a cabo cumprindo estritos parámetros de sustentabilidade ambiental, priorizando o aproveitamento dos recursos naturais e implementando tecnoloxías máis eficaces para a refrixeración, climatización e iluminación. Os novos sistemas con respecto aos convencionais poden chegar a supoñer un aforro no consumo enerxético de ata un 40%.

- Programa educativo Alimentes. Desde hai máis de dúas décadas, tratamos de concienciar a miles de nenos e nenas sobre o consumo responsable, a necesidade de evitar o desperdicio alimentario e de adoptar hábitos de vida máis saudables a través do noso programa educativo Alimentes. Ademais, tamén apoiamos campañas de sensibilización ambiental en colaboración con distintas organizacións.

O impacto da estratexia medioambiental de Gadis

A nosa estratexia ambiental permite mellorar cada ano as estatísticas de reutilización de residuos en toda a cadea e na sede central como parte dun proxecto de economía circular. En 2024, renovamos por segundo ano consecutivo o selo ‘De Residuos A Recursos: Zero A Vertedero’ de Saica Natur, que acredita o noso compromiso coa sustentabilidade ambiental. Para iso, un equipo de máis de 30 profesionais encárgase de que o sistema funcione, preparando e xestionando o envío dos materiais que chegan diariamente dos puntos de venda ás empresas especializadas para a súa posterior reciclaxe.

Estas e outras accións impactan de maneira directa na contorna e contribúen á consecución de varios Obxectivos de Desenvolvemento Sostible: ODS3. Saúde e benestar, ODS 9.Industria, innovación e infraestrutura, ODS12. Produción e consumo responsable e ODS13. Acción polo clima.