Día de Galicia, orgullo da nosa gastronomía

Un ano máis, o 25 de xullo celebramos o Día de Galicia. Unha data especial para todas as galegas e galegos, na que honramos a identidade da nosa comunidade, as nosas raíces, tradicións, cultura e gastronomía. Unha oportunidade para lembrar aquilo que nos conecta e fainos sentir parte de algo común. Coidar do noso territorio, manter vivas as nosas tradicións, escoitar a quen coñeceu outras épocas e meternos nas cociñas das nosas avoas e avós para aprender as receitas máis icónicas. Con esta publicación, queremos celebrar a gastronomía galega como factor central na cohesión social da nosa comunidade e como parte imprescindible da nosa identidade colectiva.

Celebrar a gastronomía como elemento identitario

A gastronomía concentra séculos de historia, migracións, cambios socioculturais… Un prato tradicional constrúese a través do que a terra e o mar poden ofrecer nun momento concreto. Estas receitas viaxan entre xeracións para manter vivos os sabores tradicionais e converterse nun fragmento da memoria colectiva. A versatilidade dos ingredientes e as novas tendencias gastronómicas achegan revisións da tradición, abrazando as raíces e propoñendo novas ideas para continuar a nosa narrativa gastronómica identitaria.

A gastronomía tamén é un factor clave na economía e no emprego local. As producións agrícolas, a gandería, a viticultura, o sector marítimo-pesqueiro e a restauración son sectores clave no tecido empresarial galego, que se converten en insignia cultural do territorio, en fonte de innovación, futuro e resiliencia.

Comer en comunidade e xerar vínculos a través da gastronomía é clave para a transformación social. É un dos poucos rituais que traspasa fronteiras, que está presente a nivel histórico en todas as culturas e que conforma un punto de encontro imprescindible para construír comunidade.

O mar como punto de partida

O sector marítimo-pesqueiro é unha peza fundamental da actividade produtiva da nosa rexión. A pesca, o marisqueo, a acuicultura e o sector transformador dos produtos do mar empregan no territorio galego a máis de 50.000 persoas, o que representa máis do 50% do emprego marítimo-pesqueiro de España e o 10% da Unión Europea.

É imposible falar de gastronomía local e non falar do Océano Atlántico e das rías galegas, que constitúen un dos ecosistemas mariños máis ricos de Europa. Isto reflíctese na nosa gastronomía, repleta de peixes e mariscos con orixe galega. Así, os percebes, o mexillón, as vieiras, os berberechos, as ameixas, os galos ou rapantes, a pescada ou o rodaballo son ingredientes imprescindibles nas nosas cociñas.

Sen dúbida, o “polbo á feira” é un dos pratos insignia de Galicia, cocido en caldeiros de cobre, cortado con tesoira en toros grosos, servido sobre un prato de madeira con aceite de oliva, sal gordo, pemento (doce, picante ou unha mestura de ambos) e “cachelos” (pataca cocida). Este prato tradicional está presente en todas as festividades e festas populares do noso territorio.

A terra como fonte de nutrientes

Do mesmo xeito que o mar, a terra, o sector agrícola e a gandería foron industrias clave non só para o desenvolvemento socioeconómico do territorio, senón tamén como materias primas protagónicas na gastronomía tradicional. A distribución dos terreos agrícolas en Galicia caracterízase polo minifundio, a fragmentación do territorio en pequenas parcelas que historicamente se dedicaban principalmente á explotación familiar de hortas, gandería extensiva ou cultivos como a pataca, o millo ou os grelos, un manxar típico do noso campo.

Nas zonas rurais de Galicia tamén son moi características as receitas de aproveitamento, pensadas principalmente para os invernos cun clima frío e húmido. O cocido ou o caldo galego son receitas que utilizan unha variedade de materias primas dispoñibles nas contornas rurais e que se converteron en pratos imprescindibles en calquera casa galega.

Queixos e pan con nome propio

Galicia é tamén territorio referente para os queixos, sendo o queixo de tetilla, co seu sabor suave e a súa forma icónica, un dos produtos máis coñecidos máis aló das nosas fronteiras coa súa Denominación de Orixe Protexida. Como sobremesa combinándoo con marmelo, ao natural ou nun bo bocadillo, é un produto imprescindible.

O pan galego é outra insignia da nosa cultura. Avalado pola indicación xeográfica protexida (IGP), destaca pola súa cortiza crocante e de dureza variable, a súa esponxosa miga e o alveolado abundante e irregular, que se elabora de forma artesanal con trigos autóctonos de Galicia, e non falta no día a día dos fogares galegos.

O impacto positivo de transmitir, recuperar e innovar coa nosa gastronomía

En Gadis, celebramos a diario o territorio galego e a súa gastronomía. Sentimos un forte orgullo por aquelas materias primas, ingredientes e receitas que dan forma ás nosas tradicións. Por iso, en todas as nosas seccións, contamos cunha ampla selección de produtos de orixe galega. En 2024, traballamos con 980 provedores e provedoras locais de alimentación, reforzando a nosa aposta polo produto local e de calidade. Desexamos que, este 25 de xullo, poidades celebrar coas vosas familias e amizades outro ano máis de alegrías, novos proxectos e convivencia.



Comprometémonos coa gastronomía rexional das comunidades onde operamos para contribuír a alcanzar as metas dos ODS 8. Traballo decente e crecemento económico, ODS 11. Cidades e comunidades sostibles e ODS 12. Produción e consumo responsable.