Ano internacional da muller agricultora: protagonistas para un futuro sostible

A Organización de Nacións Unidas declarou este ano 2026 como o Ano Internacional da Agricultora, coa intención de poñer en valor o papel fundamental que desenvolven as mulleres nos sistemas agroalimentarios de todo o mundo. As agricultoras están presentes en toda a cadea de valor da agricultura, desde a produción e cultivo, ata a transformación, a distribución e o comercio. Ademais, son unha peza clave na seguridade alimentaria, a nutrición, a salvagarda da biodiversidade a nivel global e o coidado do medioambiente.

A agricultura é unha fonte de emprego e ingresos imprescindible para moitas mulleres a nivel global. En 2021, as mulleres representaban o 41% da forza laboral mundial nos sistemas agroalimentarios. Con todo, é frecuente que as súas condicións laborais sexan máis precarias que as dos homes cando falamos de salarios, de estabilidade do emprego (máis irregular e informal), de traballo físico demandante ou de xornadas parciais. Á súa vez, tamén teñen menos representación no acceso e a propiedade das terras. Por tanto, a pesar de que as agricultoras representan un axente imprescindible na produción, distribución e comercio agrícola, continúan invisibilizadas e enfrontándose a unha fenda de xénero no sector. De acordo coa ONU, se se conseguise eliminar a fenda de xénero na produción agrícola, contribuiríase a reducir a inseguridade alimentaria mundial para 45 millóns de persoas.

Segundo o Observatorio sobre o sector agroalimentario español no contexto europeo do Instituto Valenciano de Investigacións Económicas, en 2024, o sector agroalimentario representou o 8,6 % do PIB e o 11,5 % do emprego en España, sendo unha industria tractora da economía a nivel estatal.

O propósito do Ano Internacional da Agricultora non é só visibilizar a situación destas traballadoras a nivel global, senón que tamén supón unha oportunidade para impulsar reformas nas políticas públicas, avanzar na igualdade de xénero e crear sistemas agroalimentarios máis resilientes.

En Gadis comprometémonos coas agricultoras

O noso modelo de negocio baséase na proximidade, a calidade, o compromiso coas persoas e a contorna. Neste sentido, as agricultoras galegas e castelán leonesas convértense nun axente fundamental para a nosa organización.

Desde haia nos, mantemos colaboracións estables cos nosos provedores e provedoras, entre os que se atopan as agricultoras locais coas que traballamos. Apostamos por relacións baseadas na confianza, no compromiso mutuo e no desenvolvemento compartido. Elas axúdannos a garantir unha variedade de produtos frescos e de proximidade, mentres contribuímos ao impulso da economía dos territorios onde estamos presentes e reforzamos a nosa capacidade de resposta en toda a cadea loxística.

En 2024, contamos con 1.437 provedores e provedoras locais, dos cales 980 foron de alimentación. Desta forma, non só buscamos minimizar o impacto no medioambiente, senón tamén garantir a oferta de produto de tempada, fresco e de calidade, ao tempo que contribuímos a manter o tecido produtivo de Galicia e Castela e León.

Co propósito de visibilizar o traballo das mulleres agricultoras, especialmente daquelas que ocupan postos de liderado en empresas ou proxectos nos territorios nos que operamos, cada ano impulsamos o Foro Mulleres Rurais. Trátase dunha xornada que pretende poñer o foco no papel de mulleres profesionais de diferentes sectores produtivos, coñecer os seus retos e compartir vivencias. De forma complementaria, elabórase unha campaña audiovisual para darlles voz e coñecer, nas súas propias palabras, o que implica ser muller agricultora. Os vídeos das diferentes edicións están dispoñibles na nosa canle de Youtube.



Tamén é importante resaltar o traballo imprescindible que realizan estas mulleres para loitar contra o cambio climático, xa que coidan da terra e do medio ambiente, e implementan estratexias de produción sostible, favorecendo a biodiversidade, a resiliencia climática e o bo estado dos solos. Así mesmo, realizan unha xestión eficiente e consciente de recursos e materias primas, mentres xeran riqueza para as contornas rurais e contribúen ao desenvolvemento comunitario en territorios non urbanos.

O impacto positivo das mulleres agricultoras

Galicia e Castela e León son territorios nos que a agricultura é un sector clave tanto para a produción como para o emprego. Á súa vez, a calidade do produto de ambos os territorios e a posibilidade de que chegue fresco aos nosos supermercados é fundamental para poder contar cunha oferta que satisfaga as necesidades da nosa clientela. Son moitas as mulleres agricultoras que traballan en ambas as comunidades autónomas como provedoras para supermercados Gadis, e esta parécenos unha gran oportunidade para agradecer e visibilizar o seu traballo.



Entre outros motivos, en Gadis traballamos con mulleres agricultoras locais porque son un colectivo esencial para combater o reto demográfico, fortalecendo os sistemas agroalimentarios e o desenvolvemento rural, o que contribúe a crear comunidades sostibles e resilientes. Deste xeito, achegámonos ás metas dos ODS 5. Igualdade de xénero, ODS 8. Traballo decente e crecemento económico, ODS 9. Industria, innovación e infraestrutura, ODS 10. Redución das desigualdades, ODS 11. Cidades e comunidades sostibles, ODS 12. Produción e consumo responsables e ODS 13. Acción polo clima.