Alimentación e diabetes. Hábitos saudables para toda a familia.

O 14 de novembro conmemórase o Día Mundial da Diabetes, unha data acuñada en 1991 pola Organización Mundial da Saúde e a Federación Internacional da Diabetes en resposta á crecente incidencia desta enfermidade en persoas de todo o mundo. A data foi elixida porque coincide co aniversario do nacemento de Sir Frederick Banting, quen, xunto a Charles Best, descubriu a insulina en 1922.

A diabetes, patoloxía coñecida como “a gran epidemia do século XXI”, é unha enfermidade crónica que se desenvolve cando o páncreas non produce suficiente insulina ou cando o organismo non utiliza eficazmente a insulina que produce. Segundo datos da OMS, esta enfermidade pasou de afectar a un 7% da poboación mundial nos anos 90, a estar presente no 14% da poboación mundial en 2022. Ese é o motivo polo que, en 2021, a OMS puxo en marcha o Pacto Mundial contra a Diabetes, coa intención de visibilizar os riscos, propoñer estratexias de prevención e seguimento desta enfermidade, especialmente naqueles países con infraestruturas sanitarias máis precarias.

Como con todas as enfermidades crónicas, a detección precoz, a prevención e o seguimento son tres factores clave na vida de todas aquelas persoas que viven coa patoloxía. Por iso, como se recolle nas metas do ODS 3. Saúde e benestar, é imprescindible lograr unha cobertura sanitaria universal, que poida facer fronte a esta e outras enfermidades.

Desde Gadis, mantemos un compromiso firme co fomento de hábitos de vida saudables, porque queremos unha sociedade resiliente, sa e activa, que contribúa a construír un futuro sostible e diverso, que non deixe a ninguén atrás.

Hábitos saudables que contribúen a reducir o risco de desenvolver diabetes

Os hábitos saudables poden contribuír a reducir o risco de desenvolver diabetes tipo 2, que é a que afecta ao 90% dos pacientes en todo o mundo. A diabetes tipo 1 segue a ser un enigma, xa que nin se coñece a causa nin se sabe que pode contribuír a previla, e a diabetes xestacional só afecta a algunhas mulleres durante o embarazo. A continuación compartimos algunhas prácticas ou estratexias que poden diminuír a probabilidade de desenvolver esta patoloxía:

• Alimentación saudable: manter unha alimentación variada e nutritiva é clave para previr o desenvolvemento de diabetes de tipo 2. Recoméndase restrinxir o consumo de graxas saturadas e alimentos ultraprocesados, priorizando unha alimentación con produtos frescos e de calidade. A fibra vexetal é fundamental na prevención desta patoloxía. Recoméndase un consumo mínimo de 20 gramos diarios, incluíndo na dieta cereais integrais, legumes, froitas e verduras. As graxas naturais son moi beneficiosas na prevención. Por iso, o consumo habitual de froitos secos, sementes, aceite de oliva ou peixes azuis contribúe a diminuír o risco de desenvolver esta enfermidade.
• Unha alimentación saudable e variada axuda a manter os niveis de glicosa en sangue, controla a tensión arterial e contribúe a regular os niveis de colesterol no organismo.
• Estilo de vida activo: realizar exercicio moderado (polo menos 150 minutos semanais) e priorizar o movemento fronte á posición sedentaria ao longo do día (por exemplo, se temos un traballo de oficina, introducir descansos frecuentes que impliquen movemento, adquirir unha mesa elevable para intercalar unha posición ergueita cunha posición corporal sentada, subir escaleiras en lugar de coller o ascensor…) contribúe a regular o peso corporal e a mellorar o funcionamento do sistema cardiovascular.
• Evitar o tabaco e as bebidas alcohólicas non só reduce as posibilidades de desenvolver diabetes tipo 2, senón que tamén favorece a saúde cardiovascular, protexéndonos doutros problemas de saúde.
• Manter un peso corporal acorde ás nosas características: cada persoa debe entender o seu corpo e cales son as necesidades do mesmo. Ter un peso corporal axeitado e mantido no tempo é un factor que reduce o risco de desenvolver patoloxías.

Que facemos en Gadis para garantir hábitos saudables para toda a familia?

En Gadis comprometémonos cos pacientes de diabetes e con todas as persoas que sofren dalgunha patoloxía que lles obriga a seguir un plan de alimentación específico. Grazas á variedade dos nosos produtos, á súa frescura, calidade, orixe local e de tempada ofrecemos á nosa clientela diversas opcións para deseñar e planificar un menú saudable. Á súa vez, contamos cunha ampla selección de alimentos de orixe ecolóxica, produtos aptos para persoas celíacas, así como alimentos baixos en sal ou zero azucres.

Os alimentos frescos de orixe local garanten unha alimentación saudable e nutritiva, que favorece o benestar das persoas. A variedade de produtos facilita que cada persoa poida elixir os produtos que máis lle favorezan en función das súas necesidades.

Ademais, en Gadis apoiamos proxectos que impulsan hábitos de vida saudables, como son os eventos deportivos, tanto a escala profesional como amateur, e eventos gastronómicos que proporcionan recomendacións para diferentes perfís de persoas. O noso programa educativo Alimentes é o proxecto insignia sobre alimentación saudable, co que fomentamos a adquisición de hábitos saudables desde a infancia, ademais de abordar temas relacionados coa sustentabilidade como o desperdicio alimentario e o consumo responsable.

Este compromiso co fomento de hábitos de vida saudables contribúe á consecución das metas do ODS 3. Saúde e benestar.