Adeus ao plástico! Como levar a túa compra a casa

Os plásticos convertéronse nunha das ameazas ambientais máis graves da nosa época. A súa fabricación a gran escala e o seu uso excesivo deterioran os ecosistemas, contaminan solos e mares, e poñen en perigo a biodiversidade do planeta. Neste marco xorde "Xullo sen plástico”, unha campaña que cada ano mobiliza a persoas de todo o mundo para reducir a súa dependencia dos plásticos dun só uso e adoptar hábitos máis responsables coa contorna. No marco desta iniciativa, conmemórase cada 3 de xullo o Día Internacional Libre de Bolsas de Plástico, unha xornada que busca visibilizar o impacto dun dos residuos máis comúns e que invita á poboación para xerar novos hábitos que limiten o seu consumo.

En 2022, cada habitante da Unión Europea xerou 36,1 quilos de residuos de envases plásticos, dos cales tan só 14,7 quilos podían ser reciclados. Aínda que o plástico é un material útil e adaptable en determinadas situacións, reducir o seu consumo e prescindir das súas versións dun só uso resulta fundamental para protexer a saúde dos nosos ecosistemas.

Facer fronte ao problema dos envases plásticos require unha resposta colectiva. Administracións, organizacións e cidadanía deben concentrar esforzos e asumir compromisos compartidos para incorporar na súa vida cotiá prácticas máis sostibles que nos acheguen a un futuro sen plásticos. Desde Gadis témolo claro e por iso, desde hai anos, ofrecemos solucións sostibles para que a nosa clientela poida levar a súa compra a casa sen utilizar plásticos dun só uso.

As iniciativas de Gadis para reducir o uso dos plásticos dun só uso

En Gadis sabemos que a redución dos plásticos refugables é clave para a resiliencia do noso negocio e o benestar do planeta. Por iso, asumimos compromisos con respecto ao uso de plásticos e envases en toda a nosa cadea de valor: desde a sede central ata os nosos provedores e provedoras, pasando polos máis de 200 supermercados de Galicia e Castela e León.

A nivel interno, é dicir, na nosa sede central, centros loxísticos, centros de redistribución, o noso sistema de transporte e na relación cos provedores e provedoras, priorizamos o uso de caixas plásticas reutilizables e de caixas de cartón. En concreto, en 2024 realizamos 7.781.858 movementos de caixas de plástico reutilizables e utilizamos un total de 794,66 tn de plástico reciclado.

Ademais, o noso compromiso cun modelo de negocio de economía circular levounos a renovar o selo de Saica Natur por terceiro ano consecutivo. Este certificado recoñece que, en 2024, valorizamos máis do 95% dos residuos que xeramos na plataforma loxística de Betanzos, reforzando así o noso modelo de produción circular.

A nivel externo, nos nosos supermercados, ofrecemos un abano variado de solucións para que a clientela poida levarse a súa compra a casa evitando o uso de plásticos dun só uso. As nosas principais iniciativas inclúen:

Seccións específicas

• Nos nosos supermercados temos ao dispor da clientela bolsas compostables, de papel reciclable ou bolsas de malla nas seccións de produtos frescos.
• Nestas mesmas seccións, a clientela tamén pode utilizar os seus propios envases. Por exemplo, poden traer as súas propias bolsas de malla para a sección de froita e verdura, así como recipientes propios, estilo tupperware, para as seccións de carnicería, charcutería e peixaría (o recipiente debe ser hermético, atoparse limpo e ser apto para almacenar produtos frescos).
• Algunhas seccións de froitos secos ou legumes tamén ofrecen recipientes específicos para a compra da súa selección de produtos a granel.

Ao pasar por caixa

• A clientela pode traer as súas propias bolsas ou carriños da compra como opción máis sostible e comprometida co medio ambiente e a economía circular.
• Nas nosas caixas tamén temos á venda bolsas de plástico de diferente gramaxe, a prezo accesible e que poden reutilizarse.
• Para maior resistencia e durabilidade, pódense adquirir as nosas bolsas de rafia con deseños innovadores aliñados coas campañas de sensibilización e publicidade de Gadis.

Envíos a domicilio

• Para os envíos a domicilio, os produtos embálanse en caixas de cartón recicladas e reciclables. En 2024, puxemos en circulación 8.190,08 tn de cartón reciclado, como parte da nosa estratexia de economía circular e do noso compromiso coa sustentabilidade medioambiental.

Con todas estas estratexias, pretendemos ofrecer á nosa clientela unha ampla selección de solucións comprometidas co medio ambiente, buscando garantir a redución de residuos e a eliminación dos plásticos dun só uso.

O impacto positivo de eliminar os plásticos dun só uso

En Gadis ofrecemos solucións para que a nosa clientela poida levarse a súa compra a casa libre de plásticos e tamén asumimos ese compromiso nos nosos procesos internos, minimizando o uso de plásticos dun só uso. Nesta estratexia conxunta, todos —Gadis, as nosas provedoras e provedores e a clientela— desenvolvemos un papel fundamental para conseguir que as compras sexan sostibles e responsables. Así, reducimos a utilización de plásticos nos envases dos produtos de alimentación e promovemos unha compra libre de plástico dentro dos nosos supermercados e ata que chega aos fogares.



Grazas a estas estratexias e compromisos, achegámonos á consecución das metas dos ODS 11. Cidades e comunidades sostibles, ODS 12. Produción e consumo responsables, ODS 13. Acción polo clima, ODS 14. Vida submarina e ODS 15. Vida de ecosistemas terrestres.