A compra da túa vida, un compromiso compartido

Por sexto ano consecutivo, mantemos o noso compromiso coa Asociación Española Contra o Cancro e este mes de febreiro volvemos formar parte da campaña “A compra da túa vida”. Trátase dunha iniciativa solidaria que, coincidindo coa celebración do Día Mundial Contra o Cancro, anima á sociedade civil a realizar doazóns que apoien:

• A atención gratuíta, integral e personalizada a pacientes e familiares (incluíndo atención psicolóxica, orientación social, atención xurídico laboral. asesoramento médico sanitario, servizo de apoio e acompañamento e servizo de atención telefónica).
• Estar máis preto de alcanzar o 70% de supervivencia ao cancro en 2030.
• A promoción da saúde, garantindo a igualdade de oportunidades fronte ao cancro, con programas e iniciativas de información, sensibilización e o fomento de hábitos de vida saudables.
• O impulso da investigación, co respaldo á maior rede de investigación en España e achegando resultados a persoas e familias.

Se queres participar nesta campaña, entre o 6 e o 12 de febreiro poderás realizar unha achega económica ao pasar por caixa no teu Gadis de confianza. É moi sinxelo, xa que só tes que engadir unha doazón ao teu ticket de compra. Desta maneira, contribuirás a mellorar a calidade de vida de miles de pacientes e a que multitude de familias poidan convivir con esta enfermidade desde un lugar consciente e informado.

A solidariedade, piar fundamental na nosa estratexia de Responsabilidade Social Corporativa

En Gadis, sabemos que xeramos un impacto directo nas comunidades nas que operamos. É por iso que, a través do noso programa de Responsabilidade Social Corporativa, buscamos colaborar con iniciativas de entidades, organizacións do terceiro sector e sociedade civil, en proxectos que se aliñan coa nosa misión.

A solidariedade é unha peza clave no noso compromiso e nas colaboracións que mantemos con distintos axentes. Promovemos a cooperación, a xenerosidade e a responsabilidade compartida porque, ao longo dos anos, constatamos os valores compartidos coa nosa clientela e somos conscientes de que, grazas a ela, podemos avanzar cara a un mundo máis inclusivo, sostible e resiliente.

“A compra da túa vida” en Gadis

A campaña “A compra da túa vida” de 2025 foi especialmente inspiradora, xa que superamos nun 135% a recadación do ano anterior, cunha achega económica de 34.149 € por parte da nosa clientela en 222 supermercados Gadis de Galicia e Castela e León. En total, nas cinco edicións que acollemos a campaña, doamos preto de 80.000 € para a Asociación Española Contra o Cancro.

Nesta edición 2026 volvemos animar á nosa clientela para manter ese compromiso a través das doazóns que poden realizar en calquera dos supermercados Gadis de Galicia e Castela e León entre o 6 e o 12 de febreiro. Para participar, só tes que indicalo no momento en que esteas a abonar a túa compra. O persoal de caixa preguntarache a cantidade que desexas doar, entre un mínimo dun euro e un máximo de 99 euros. Unha vez terminada a campaña, entregaremos a cantidade doada á AECC para que poida cumprir cos seus obxectivos e continuar co labor que realizan con pacientes e familiares.

O impacto positivo de “A compra da túa vida”

Os nosos supermercados xeran un punto de encontro clave para a clientela e entidades do terceiro sector. Na nosa estratexia de RSC, apostamos por ir máis aló da distribución alimentaria, asumindo un rol activo no seo das comunidades onde operamos e ofrecendo un espazo de visibilidade para certas iniciativas solidarias que achegan un inmenso valor á nosa sociedade.

Unha vez máis, sumámonos a “A compra da túa vida” da AECC para contribuír desde os nosos supermercados á loita contra o cancro, a fomentar a investigación e garantir que pacientes e familiares poidan alcanzar unha vida digna e plena. Formar parte desta campaña permítenos traballar de forma conxunta coa nosa clientela e sumar esforzos para achegar a unha causa global que afecta a millóns de persoas en todo o mundo. Grazas ao compromiso das persoas, buscamos superar cada ano a barreira dos 30.000 € de doazóns, para poeder garantir unha achega notable a esta iniciativa solidaria imprescindible.

A nosa participación nesta iniciativa solidaria permítenos achegarnos á consecución das metas dos ODS 3. Saúde e benestar, ODS 10. Redución das desigualdades, ODS 11. Cidades e comunidades sostibles e ODS 17. Alianzas para lograr obxectivos.