Día Mundial do Medio Ambiente 2023: sen contaminación por plásticos
O próximo 5 de xuño celébrase o Día Mundial do Medio Ambiente, unha conmemoración que este ano alcanza o medio século de acción. Desde 1973, o seu obxectivo é concienciar sobre a fraxilidade do noso planeta e dos seus recursos naturais. Converteuse nunha plataforma internacional para fomentar a conciencia ambiental e estimular a posta en marcha de medidas. Desde políticas nacionais e internacionais ata cambios nos nosos hábitos de consumo, todo suma no coidado do planeta!
Co lema “Sen contaminación por plásticos”, nesta edición ponse o foco nun dos maiores problemas de contaminación a nivel mundial. A organización busca resaltar o uso indiscriminado deste material. Cada ano prodúcense máis de 400 millóns de toneladas de plástico, das cales, a metade son dun só uso. Ademais, estímase que entre 19 e 23 millóns de toneladas de refugallos plásticos terminan cada ano en lagos, ríos e mares, provocando graves danos nos ecosistemas. En Gadis, levamos moito tempo tratando de mitigar a contaminación por plástico e fomentando o seu uso racional. Por iso, queremos sumarnos a esta iniciativa, convidando a unha reflexión sobre o seu uso e como xestionamos os seus residuos . Queres saber cales son os nosos retos? Segue lendo!
O planeta está a afogarse en plástico
Desde a década dos 70, na que se comezou a celebrar este Día, a taxa de produción de plástico creceu moito máis rápido que a de calquera outro material. De continuar con esta tendencia, prevese que a produción mundial de plástico primario alcance os 1.100 millóns de toneladas en 2050. A estes datos, súmase que aproximadamente o 36% de todos os plásticos producidos utilízanse en envases e que preto do 85% dos envases dun só uso termina en entulleiras ou como residuos non regulados. Recíclase menos do 10% dos residuos plásticos xerados en todo o mundo.
O tipo máis común de residuos plásticos presentes no medio ambiente son as cabichas de cigarros, cuxos filtros conteñen pequenas fibras de plástico. Pero hai moitos outros refugallos plásticos que se atopan con frecuencia en contornas naturais: envoltorios de alimentos, botellas de plástico, tapóns, bolsas, palliñas, etc. Produtos que adoitan estar presentes na nosa rutina cotiá e que talvez nin nos preguntamos onde poderían terminar.
Sabías que máis de 800 especies mariñas e costeiras vense afectadas por esta contaminación? Este tipo de residuos entraña moitos perigos para elas, desde a inxestión ou o enredo ata a degradación dos seus ecosistemas. Non son as únicas vítimas. Os microplásticos invaden a auga e mesmo o aire. Un estudo calculou que as persoas inxeren máis de 50.000 partículas de plástico cada ano. Aínda que se descoñece a cantidade de microplásticos que pode tolerar o organismo e a magnitude do dano que causan, xa se sabe que o plástico acumulado pode afectar o sistema inmune e alterar o equilibrio intestinal.
É importante tomar conciencia de que os produtos plásticos cuxos residuos non se xestionan de maneira adecuada non soamente prexudican á saúde humana e a biodiversidade, senón que contaminan todo tipo de ecosistemas. En marzo de 2022, os 193 estados membros das Nacións Unidas acordaron terminar coa contaminación por plástico. Para iso, hai que reducir o plástico máis problemático e innecesario e apostar pola circularidade a través da reutilización, a reciclaxe e a reorientación e diversificación do mercado. Este cambio pode ter varios beneficios:
– Reducir o volume de plásticos que chegan aos océanos en máis dun 80% para 2040.
– Reducir a produción de plástico virxe nun 55%.
– Reducir as emisións de gases de efecto invernadoiro nun 25%.
– Crear 700.000 postos de traballo.
O compromiso de Gadis coa redución da contaminación por plástico
A sustentabilidade e a protección do medio ambiente son dous dos piares de Gadis, que se reflicten nas nosas accións no que se refire ao uso de plásticos e a xestión dos seus residuos:
– Redución do plástico xerado e reciclaxe. Puxemos en marcha accións para reducir os plásticos dun só uso na experiencia de compra. Nos nosos establecementos poñemos ao dispor da clientela bolsas de papel e de malla reutilizables para impulsar a redución de residuos e a eliminación dos plásticos dun só uso. O noso consumo de plástico disminuíu notablemente como consecuencia da concienciación integral da empresa.
– Xestión de residuos. Introducimos melloras de xestión de residuos en loxística, incorporando palés CHEP e envases de transporte reutilizables IFCO. Ademais, xestionamos os nosos residuos a través dun sistema de separación e clasificación segundo a tipoloxía do material refugado. Unha vez segregados correctamente, envíanse ás instalacións dos xestores de residuos autorizados.
– Uso de plástico reutilizable. Entre as medidas implantadas para reducir o plástico e aumentar a eficiencia, destaca o uso de caixas de plástico reutilizables, hixienizadas mediante lavado tras o seu uso. Reutilizáronse máis de cinco millóns de veces.
Isto é só un pequeno resumo das políticas que estamos a levar a cabo para o coidado da nosa contorna. Apetecíanos compartilo contigo aproveitando a celebración do Día Mundial do Medio Ambiente para mostrar que todas as accións suman. E ti? Tes os teus propios retos para reducir a contaminación por plástico? Cóntasnolos?
