Receitas saudables para comer en familia

situación que vivimos na actualidade obríganos a pasar boa parte do noso tempo na casa. Polo tanto, este é un bo momento para preparar algunhas receitas saudables para comer en familia. Pratos moi sinxelos e deliciosos cos que comer san e pasar un rato moi agradable na cociña. Cociñar é unha das tarefas á que moitos acudimos nestes tempos que corren. Unha maneira non só de pasar o tempo, tamén de preparar algo rico e saudable para os teus. Aquí deixámosche algunhas receitas para comer en familia que podes elaborar sinxelamente.

Espaguetes de cabaciña con gambas

Se substitúes a pasta por tiras de cabaciña, obterás un prato moi saudable. Unha receita para comer en familia moi sinxela de preparar. Ingredientes

• 2 cabaciñas medianas.
• 2 dentes de allo.
• 500 gramos de gambas crúas peladas.
• 100 mililitros de viño branco.
• 2 culleradas de zume de limón.
• Perexil fresco picado.
• Aceite de oliva.
• Sal.

Preparación

1. Lava as cabaciñas e córtaas en forma de espaguetes.
2. Engade dúas culleradas de aceite a unha tixola. Cando estea quente, verte os 2 dentes de allo picados e, un pouco máis tarde, as gambas peladas e a sal.
3. Saltea todo durante un par de minutos e retírao da tixola.
4. Verte na tixola o viño branco e o zume de limón e ferve a lume suave durante un minuto.
5. Engade os espaguetes de cabaciña e coce todo a lume vivo, removendo ben, durante tres minutos.
6. Engade, finalmente, as gambas, remove todo e serve cun pouco de perexil fresco picado por enriba.

Croquetas de salmón

O salmón é un dos peixes máis ricos e saudables. Se o combinas cunhas deliciosas croquetas, terás un prato moi saudable para comer en familia. Ingredientes

• 400 gramos de puré de patacas.
• 250 gramos de salmón cocido.
• 2 cebolletas finas picadas.
• 2 ovos.
• 60 gramos de pan raiado.
• 2 culleradas pequenas de zume de limón.
• 65 gramos de chícharos.
• Perexil fresco picado.
• 1 cullerada pequena de mostaza integral.
• Ceboliño picado.

Preparación

1. Mestura nun recipiente grande as patacas, o salmón, a cebolleta, o zume de limón, o perexil, o ceboliño, os chícharos, a mostaza e un ovo batido.
2. Mestura todo para que os ingredientes se integren.
3. Cunha culler da mestura forma as croquetas.
4. Coloca as croquetas na bandexa do forno e déixaas arrefriar nuns 15 minutos.
5. Quenta o forno a 180 grados centígrados.
6. Mentres tanto, bate o outro ovo e colócao nun prato cheo.
7. Esparexe máis tarde o pan raiado noutro prato.
8. Mergulla cada croqueta no ovo e reboza no pan raiado.
9. Verte aceite sobre as croquetas e méteas no forno uns 20 minutos.

Champiñóns salteados con manteiga de allo

Se che gustan os champiñóns, encantarache preparar esta receita saudable para comer en familia. Unha das máis sinxelas de elaborar. Ingredientes

• 500 gramos de champiñóns.
• 1 cullerada de aceite de oliva.
• 3 culleradas de manteiga.
• 1 cullerada de allo picado.
• 1 cullerada de perexil fresco picado.
• Sal.
• Pementa.

Preparación

1. Limpa os champiñóns e córtaos á metade ou en láminas.
2. En segundo lugar, colle unha tixola, pon nela unha cullerada de aceite e saltea.
3. Cociña os champiñóns uns 4 minutos a temperatura media-alta.
4. Remove e déixaos no lume uns 2 minutos máis.
5. Engade a manteiga e o allo, baixando un pouco o lume.
6. Cociña removendo un pouco para que os ingredientes se integren ben.

Berenxena con queixo parmesano

O queixo parmesano dálle un sabor moi particular a calquera receita saudable. Neste caso, combinámolo cunha verdura tan deliciosa e nutritiva como a berenxena. Ingredientes

• 2 berenxenas peladas e cortadas en toros.
• 2 cuncas de pan raiado integral.
• Tomate frito caseiro.
• Mozzarella en finos liscos.
• Queixo parmesano raiado.
• Media cunca de alfábega.

Preparación

1. Corta en primeiro lugar as berenxenas en toros e sécaas.
2. Engraxa a bandexa do forno e, despois, coloca nela unha base de toros de berenxena.
3. Quenta o forno a 180 grados durante 20 minutos.
4. Saca as berenxenas do forno e coloca na bandexa unha base de salsa de tomate.
5. Engade unha capa de toros de berenxena e mozzarella.
6. Fai capas até terminar con toda a berenxena.
7. Remata todo co queixo raiado.
8. Cociña finalmente no forno durante 30 minutos.

Como podes comprobar, podes cociñar sen ningún problema estas receitas saudables para comer en familia. Sinxelas de preparar en moi pouco tempo e con ingredientes que podes mercar en calquera Gadis.