receita
Hai unha receita para cada momento e en Gadis queremos compartilas todas contigo.
Ensalada de bacallau con vinagreta de manga
Hoxe imos cunha receita fresquiña, ideal para os días de calor: ensalada de bacallau con vinagreta de manga.Ademais, nestas épocas do ano, todos buscamos receitas que, ademais de refrescantes, sexan fáciles, rápidas de facer e que non precisen de moito cociñado en tarteiras ou en fornos. Se nesta receita cocedes os boniatos no micro, ademais de aforrar tempo, resultaravos moito menos molesta a calor de cociñalos na pota ou no forno.A ver se esta ensalada de bacallau con vinagreta de manga se converte nun dos vosos clásicos para este verán.
Imprimir receita
Equipamento
- Cortador de verduras
- Estoxo de silicona para micro
Ingredientes
- 1 boniato grande
- 500 g de lombo de bacallau desalgado
- 1 cuarto de cebola vermella
- Media manga
- 1 ovo duro
- 1 lima
- Olivas negras ao gusto
- Aceite, vinagre e mostaza ao gusto
Elaboración paso a paso
Preparación previa
- Cortamos en liscos finos o bacallau desalgado e xa ao punto de sal. Sempre vos digo que este formato de bacallau é moi rendible e comodísimo porque está listo para mariñar ou para cociñar en calquera momento e como vén envasado ao baleiro, consérvase moitos días na neveira.
- Poñemos os liscos no prato de presentación e mariñámolos en aceita de oliva virxe e reladura de lima.
- Picamos a cebola vermella e deixámola mariñar en vinagre de mazá para que perda un pouco do seu "bravío".
- Fregamos ben o boniato cun cepillo ou cun estropallo metálico, e ben húmido, cocémolo no micro durante 8 ou 9 minutos. Deixámolo arrefriar, pelamos e cortamos en toradas e despois en anaquiños.
- Cocemos o ovo e mondámolo.
Vinagreta
- Cortamos moi miúdas a media manga e mais as olivas negras e engadimos á cebola que tiñamos reservada en vinagre.
- Incorporamos á mestura anterior un pouco de mostaza inglesa ao gusto e un bo chorro de aceite virxe. Mesturamos ben.
Empratado
- Empratamos intercalando os anacos de boniato entre os liscos de bacallau.
- Vertemos a saborosa vinagreta de manga por enriba e terminamos co ovo picado e cunhas folliñas de pirixel.
Notas
E se non sodes moi fans do bacallau, é unha receita ideal para aproveitar sobras dalgún peixe que vos sobrara ou para facelo con conservsa, cuns lombos de bonito, con xarda…
