DÍA DAS LETRAS GALEGAS

Que facemos en Gadis?

Desde hai máis de dúas décadas, traballamos sen interrupción a favor da difusión da literatura galega, coa edición impresa de centenares de miles de exemplares de obras literarias dirixidas a diferentes públicos. A nosa aposta abarca a autores e autoras emerxentes e tamén a escritoras e escritores máis consagrados, apostando por diversos xéneros co obxectivo de achegar a máis ampla representación das letras galegas á sociedade.

Ademais, situámonos á vangarda da promoción cultural con campañas pioneiras que converten, por exemplo, as bolsas da compra en vehículos de cultura, enchen as rúas de versos ou reúnen nun fanzine a varios artistas da nosa comunidade. Así, as bolsas creadas para esta ocasión levaron ás casas da nosa clientela textos sobre a orixe das Letras Galegas, poemas e poemarios, fragmentos dalgunha obra, contos, ilustracións, puntos de lectura, etc. para poñer en valor a cultura propia nas súas diversas manifestacións. A nosa convicción de que a lingua une e reforza a identidade común levounos a contar cunha páxina web desta efemérides e a asinar, en 2023, un acordo de colaboración coa Xunta de Galicia, enmarcado na celebración da 60 edición da festividade das Letras Galegas, para promover o galego entre a mocidade.