XESTIÓN RESPONSABLE DOS RESIDUOS

Como parte do noso compromiso ambiental, a redución dos residuos e a súa correcta xestión é unha peza clave. Contamos cun sistema interno de clasificación e reciclaxe de envases e embalaxes. Traballamos para implantar a xestión de residuos de forma transversal en todos os puntos de venda, centros loxísticos, provedores e outros axentes externos. Cun sistema empresarial baseado na economía circular, levamos a cabo numerosas medidas dirixidas á reutilización e o uso de materiais sostibles.

Que facemos en Gadis?

Volvemos introducir no mercado máis de 8.650 toneladas de cartón, que se empregan nos supermercados GADIS como caixas. Tamén transformamos máis de 630 toneladas de polietileno de baixa densidade transparente en film estirable, que se utiliza nos nosos puntos de venda.

Os principios da economía circular e a xestión de residuos

O noso compromiso social, económico e ambiental vai máis aló do esixido por lei, por iso falamos de Responsabilidade Social Corporativa. Non obstante, o estrito cumprimento da normativa é tamén unha das nosas bases de negocio sostible, de maneira que debemos falar da Lei 7/2022, do 8 de abril, de residuos e solos contaminados para unha economía circular.

Esta Lei ten por obxecto sentar os principios da economía circular a través da lexislación básica en materia de residuos, así como contribuír á loita contra o cambio climático e protexer o medio mariño”. Preténdese contribuír así ao cumprimento dos Obxectivos de Desenvolvemento Sostible, incluídos na Axenda 2030 e en particular aos obxectivos 12 (produción e consumo sostibles), 13 (acción polo clima) e 14 (vida submarina)”.

Obxectivos de Desenvolvemento Sostible

Ademais, no artigo 7, punto 4.c, indica que os comercios retallistas de alimentación deberán informar a súa clientela dos impactos ambientais e das obrigacións de xestión dos residuos dos envases dos produtos que adquiran. En particular, informarán como mínimo nun lugar destacado do propio establecemento, sobre os seguintes aspectos:

1.º Obrigacións do consumidor no referente á devolución dos envases reutilizables e á separación dos residuos de envases nos distintos contedores ou puntos de recollida establecidos, conforme á forma de xestión establecida.
2.º Promoción das bolsas reutilizables , e optimización da utilización das bolsas dun só uso, para reducir o consumo innecesario destes envases.
3.º Información sobre a dispoñibilidade no comercio de envases reutilizables , así como sobre a posibilidade de uso de recipientes reutilizables por parte do consumidor de conformidade co establecido no artigo 9.3.

Podes atopar máis información descargando esta documentación.