Bowls saudables

A chegada do outono adoita ir acompañada de certos síntomas de cansazo. A volta á rutina e a readaptación a un ritmo máis acelerado que o que levamos durante as vacacións poden ser a causa. Sabías que a alimentación é unha das claves para combater esas sensacións? Comer ben, seguindo unha dieta variada e equilibrada, é un hábito saudable ao que non debemos renunciar. En Gadis mantemos un compromiso firme para axudarche a preparar pratos nutritivos que abarquen toda a pirámide alimenticia e, por iso, imos falarche dunha tendencia culinaria que chegou hai un par de anos para quedar. Seguramente, xa te decataches dos cuncos tan apetecibles que invadiron os medios sociais nos últimos meses. Trátase dunha corrente que se puxo moi de moda e que se instaurou tamén en varios locais: os bowls saudables.

 

Que son os bowls saudables?

Os bowls saudables son pratos que, cunha preparación sinxela, combinan varios ingredientes integrando de maneira equilibrada distintos grupos alimenticios. Cal é a novidade desta proposta? A sinxeleza da preparación e a súa presentación! Sérvense en cuncos ou pratos fondos e cóidase moito a súa estética con cores, que logra facelos máis atractivos. Admiten unha gran variedade de combinacións de alimentos sen renunciar á sinxeleza e concedendo moita importancia ao sabor. Convertéronse na fórmula perfecta para incorporar facilmente certos elementos como legumes, verduras, sementes ou froitos secos nun só prato, potenciando as súas propiedades e nutrientes.

Todo cabe nun cunco! Só hai que saber combinalo e acomodalo. Estes bowls reciben varios nomes en función do seu contido: Buddha bowl, açai bowl, poke bowl ou smoothie bowl. O Budhha bowl é un prato repleto de proteínas, hidratos e graxas saudables, preferentemente vexetariano. O seu nome pode deberse á filosofía de moderación que rexía a alimentación de Buda e que lle levaba a colocar toda unha comida nun único cunco, aínda que hai quen opina que a orixe é máis “terreal”: a cantidade sobresaliente de alimentos suxire a forma dunha barriga semellante á de Buda. O açai bowl leva o froito brasileiro do mesmo nome, coñecido polo seu alto contido en antioxidantes e ácidos graxos como omega 3, 6 e 9. O poke bowl baséase nun prato hawaiano. Poke significa ‘cortar’ en hawaiano e refírese aos anacos cadrados de peixe cru marinado, que se colocan sobre arroz e acompáñanse de verduras e algunha salsa. Na súa versión en cunco, o arroz pode substituírse por quinoa ou fideos e o peixe adoita ser atún ou salmón. O smoothie bowl, pola súa banda, é un zume de froitas e verduras natural, ao que se engaden lácteos, cereais, froitos secos e sementes.

Sexa cal for o tipo de cunco, o concepto xurdiu coa intención de lograr unha dieta máis completa e equilibrada ofrecendo múltiples opcións sen necesidade de empregar moito tempo na elaboración.

Que has de ter en conta para preparar un bowl saudable?

Estás a pensar en preparar un bowl saudable e non sabes por onde empezar? É moi sinxelo! Pódense utilizar ingredientes crús ou cociñados ao dente (esquece os fritos). O importante é que sexan frescos e saudables. Na súa versión salgada, adoitan levar algún tipo de salsa ou aderezo tamén elaborados con ingredientes nutritivos.

Ven a Gadis a facer a compra e deixa voar a túa imaxinación! Estes boles bríndanche a posibilidade de combinar distintos sabores nun mesmo prato. Aquí dámosche algunhas claves para que a mestura sexa equilibrada e o resultado, todo un éxito:

  • O cunco debe levar polo menos un par de verduras e mellor de cores diferentes. É recomendable que polo menos una desas verduras estea crúa para que conserve intactos os seus nutrientes.
  • A base do prato adoita facerse con vexetais de folla verde (leituga, cóengo, rúcula…) aínda que tamén podes optar por unha base cremosa tipo gazpacho ou crema de verdura.
  • Os vexetais de maior consistencia como, por exemplo, cogombro, cenoria, tomate, brócoli ou coliflor achegarán unha textura que contrasta coa das follas ou a crema.
  • Non esquezas as proteínas de calidade, xa que lograrán prolongar a sensación de saciedade. Se queres un cunco vexetariano, podes apostar por legumes ou outro tipo de preparados como o tofu. Pola contra, podes engadir lácteos, carne (mellor magra), ovo, peixe ou marisco.
  • Usa carbohidratos de absorción lenta como cereal integral (arroz integral, quinoa, mijo…), pataca, batata ou cabaza.
  • Para achegar un toque doce, recorre a algunha froita como a mazá, os froitos vermellos, o mango, o kiwi ou a papaia, por exemplo.
  • O crunch podes conseguilo con sementes ou froitos secos.
  • Opta por aderezos e salsas saudables. Podes preparar unha vinagreta, unha salsa de iogur con algunha herba aromática ou acompañar o prato con aceite de oliva, humus ou guacamole.
  • No caso de que vaias preparar un smoothie, has de ter en conta que debe de ser o suficientemente espeso para que os alimentos non se afundan no cunco cando os anadas. Como logralo? Podes conxelar a froita antes de preparar o zume ou engadir aguacate, dátiles ou flocos de avea para achegar consistencia. Os cubos de xeo tamén funcionan.

En canto ás cantidades, elixe un cunco mediano ou un prato sopeiro. Éncheo, fundamentalmente, con verdura (mellor pouca cantidade de varios tipos para incluír máis nutrientes) e engade un puñado de proteína e un puñado de carbohidratos. Listo para tomar!

No próximo post darémosche cinco receitas para preparar bowls saudables e deliciosos. Mentres tanto, anímaste a facer algún bowl?

Deja un comentario