Bocadiños de bacallau
Estes bocadiños de bacallau que hoxe imos marcar aquí, están moi inspirados nos "bolinhos de bacalhau" portugueses.Para o meu gusto, o problema que poden ter estes bocadiños de bacallau é que estean un pouco densos de máis. Isto ímolo evitar engadíndolle á receita uns ovos coas claras a punto de neve; así, quedarán máis lixeiros e esponxosos.
Imprimir receita
Equipamento
- 1 cazo ou tixola (fonda para fritir)
- 1 Tarteira
- 1 batedora
- 1 recipiente para mesturar
Ingredientes
- 300 g bacallau desalgado
- 400 g patacas medianas
- 2 ovos
- 400 ml aceite de oliva
- 1/2 cda allo en po
- 1/2 cda cebola en po
- 3 ramas pirixel
- sal
- 200 g tomate frito
- salsa picante (ao gusto)
Elaboración paso a paso
Cocción patacas:
- Cocemos as patacas con pel no micro (9 minutos) ou nunha tarteira de forma habitual, ata que estean ben brandas. Reservamos.
Preparación masa bocadiños:
- Nun batedor trituramos o bacallau desalgado co pirixel. Condimentamos coa cebola e co allo en po.
- Pelamos as patacas e esmagámolas. Engadimos o bacallau triturado e condimentado e mesturamos. Probamos o punto de sal e, de ser necesario, engadimos máis. Incorporamos á mestura, primeiro as 2 xemas de ovo e despois, con movementos envolventes, as dúas claras a punto de neve.
Fritura:
- Nun cazo ou nunha tixola con aceite de oliva, quente pero sen ferver, imos deixando caer culleradas da masa de bacallau.
- Deixámolas fritir, virándoas ata que estean douradiñas. Deixamos escorrer ben os bocadiños de bacallau sobre papel de cociña.
Empratado:
- Servímolos acompañados de salsa de tomate adubiada cun chisco (mellor, bastante) de Tabasco chipotle e mais de pirixel picado.
