Cinco pratos de culler de tempada

Nestes días no que os termómetros se han esborrallado e o inverno móstranos a súa cara máis fría, seguro que, ao chegar a casa, agradeces un prato de culler que entoe o teu corpo e deleite o teu padal. Non hai nada como unha boa comida caseira para repoñerse destas temperaturas, non crees? É verdade que as receitas máis tradicionais de pratos de culler son bastante contundentes, pero imos darche algunhas ideas que inclúen tamén opcións máis lixeiras para que poidas preparar un menú variado e adaptado a todos os gustos.

Cinco receitas de pratos de culler de tempada

Os pratos de culler son perfectos para amornar o corpo nesta época do ano. En Gadis, queremos axudarche a que a túa dieta sexa saudable e sustentable e, por iso, animámoste a apostar polo consumo de produtos frescos, locais e de tempada. Imos propoñerche cinco receitas de culler con opcións moi variadas para que estes días goces dun menú caseiro, completo e respectuoso coa contorna.

Crema de castañas e apio

Aínda que a tempada de castañas adoita terminar en decembro, a súa fácil conservación fai que poidas atopalas no mercado ata finais de inverno. As súas propiedades nutritivas convértenas nun alimento perfecto para os meses de frío e é un produto moi versátil que poderás incluír en distintas receitas. Aquí propoñémosche unha opción máis lixeira.

Ingredientes:
– 500 g castañas
– 1 apio
– 1 cebola
– 1 nabo
– Cravo
– 250 ml nata para cociñar
– Sal
– Pementa negra
– Perexil fresco picado

Preparación:
– Pela as castañas e cóceas en auga durante 20 minutos. Unha vez cocidas, escórreas e resérvaas.
– Limpa e pela o nabo.
– Retira os fíos da rama e corta o apio.
– Pela a cebola e pártea á metade. Pon un cravo en cada metade da cebola.
– Introduce nunha cazola a cebola, o nabo e o apio. Sazona con sal e pementa, engade 600 ml de auga e leva a ebulición. Unha vez que fervese, coce a lume lento durante 30 minutos.
– Retira a cebola e tritura coa batedora o apio, o nabo e as castañas co caldo e a metade da nata.
– Quenta de novo a mestura antes de servir.
– Podes acompañar a crema co resto da nata e un pouco de perexil fresco picado. Se prefires algo máis lixeiro, prescinde da nata.

Crema de cabaciña con cebola caramelizada e mazá aceda

Esta é unha boa receita para unha cea saborosa e lixeira. Con estas cantidades, sae bastante crema, así que che servirá para ter reserva na neveira. O máis importante nesta crema é caramelizar ben a cebola nos seus propios azucres.

Ingredientes:
– 750 g cabaciña
– 2 cebolas
– 1 mazá tipo Granny
– 2 patacas

Preparación:
– Pica a cebola en brunoise e deixa pochar a lume moi lento ata que se caramelice. A cebola caramelizarase nos seus propios azucres. Podes consultar algúns trucos para facelo aquí.
– Mentres se vai caramelizando a cebola, pela e corta as cabaciñas, as patacas e a mazá.
– Cando a cebola comece a tostarse, incorpora primeiro as cabaciñas e deixa que refoguen dous ou tres minutos.
– Despois, engade auga suficiente para cubrir todo e incorpora as patacas cortadas. Coce todo durante uns 15 minutos, ata que a pataca estea practicamente feita. Nese momento, incorpora a mazá e deixa cociñar cinco minutos máis.
– Retira a pota do lume e tritura todo ata obter unha crema fina.
– Podes servila acompañada de cebola crocante, sementes de sésamo, anaquiños de mazá ou xenxibre.

Alcachofas guisadas con gambas

Estamos en plena tempada de alcachofas, así que é un bo momento para incluílas no teu menú. Aquí presentámosche un prato lixeiro e saboroso no que son as protagonistas.

Ingredientes:
– 8 alcachofas
– 4 lagostinos grandes ou gambas
– Aceite de oliva virxe extra
– 1 dente de allo
– Sal

Preparación:
– Limpa as alcachofas, refugando as follas exteriores e a metade superior. Cóceas durante 20 minutos nunha cazola con auga e sal. Escórreas e reserva o caldo da cocción.
– Corta as alcachofas cocidas pola metade: o corazón e a base da alcachofa por unha banda e as follas por outro.
– Nunha tixola, saltea as bases e os corazóns das alcachofas en aceite de oliva cun dente de allo.
– Tritura as follas co caldo da cocción e coa o puré resultante. Engádeo á tixola e deixa que se cociñe durante uns minutos co salteado.
– Coce os lagostinos ou as gambas uns tres minutos e utilízaas como guarnición do guiso. Se queres, podes usar máis dunha por prato ou engadir outro marisco.

Puré de lentellas con brandada de bacallau

Esta receita é unha forma distinta de combinar o bacallau con legumes que achega tamén novas texturas.

Ingredientes:
(Para o puré de lentellas)
– 800 g lentellas cocidas en conserva
– 1 cebola
– 400 ml de caldo de verduras
– Aceite de oliva
– Sal
– Pementa negra

(Para a brandada de bacallau)
– 400 g bacallau desalgado
– 100 ml aceite de oliva
– 100 ml leite
– 1 pataca
– 3 dentes de allo
– Sal
– Pementa negra

Preparación:
Comeza preparando a brandada de bacallau
– Lava a pataca e cócea con pel durante 20 minutos. Deixa que arrefríe para pelala e cortala en dados.
– Quenta nunha cazola con auga o bacallau e retira do lume ao primeiro fervor. Retíralle a pel e as espiñas para desmigalo.
– Pela os dentes de allo e dóuraos nunha tixola con aceite. Retira os allos e reserva o aceite.
– Quenta o leite sen que chegue a ferver.
– Tritura coa batedora o bacallau e a pataca. Engade aos poucos o leite e o aceite que reservaches. Continúa triturando ata obter un puré denso. Rectifica o sal.
A continuación, prepara o puré de lentellas:
– Escorre as lentellas e colócaas nun cunco.
– Pela e pica a metade da cebola. Corta a outra metade en xuliana e resérvaa.
– Quenta dúas culleradas de aceite nunha cazola e refoga a cebola picada cun chisco de sal e de pementa.
– Engade as lentellas e o caldo de verduras. Leva a ebulición e coce 5 minutos máis a lume lento.
– Tritura coa batedora, reservando algunhas lentellas para a decoración.
– Quenta o resto do aceite e frite a cebola en xuliana.
– Serve o puré en cuncos, engade unha “bóla” de brandada de bacallau e decora coas lentellas que reservaches e a cebola en xuliana.

Pote de acelgas con chourizo

É un guiso sinxelo e tradicional perfecto para os días de inverno.

Ingredientes:
– 1 feixe de acelgas
– 1 pataca mediana
– Pemento
– 1 chourizo
– 3 dentes de allo
– Aceite de oliva virxe extra
– 250 g fabas brancas cocidas
– 1 l caldo de pito

Preparación:
– Limpa e corta a pataca e as acelgas. Ponas a ferver co chourizo cortado no caldo de maneira que todo quede cuberto. Déixao que se cociñe ata que todo estea tenro (aprox. media hora).
– Doura o allo picados nun pouco de aceite. Engade o pemento, pero non deixes que se fría.
– Engade a allada á pota das acelgas xunto coas fabas ben escorridas. Mestura todo un par de minutos ao lume para darlle un fervor.
– Á hora de servir, podes engadir uns anacos de ovo duro.

Sabes o bo destas receitas? Todas poden prepararse con antelación. Así, cando chegues a casa, só terás que quentar e á mesa! Anímaste a preparar un batch cooking con elas?

Deja un comentario