Especial #GadisSalud: o cogombro

Na primavera, comeza a época de ensaladas e un dos seus ingredientes principais durante esta tempada é o cogombro. É unha das hortalizas básicas da dieta mediterránea e está presente en moitas receitas tradicionais da nosa gastronomía como o pisto ou o gaspacho, por exemplo. Ademais, no imaxinario colectivo asóciase ao coidado facial. Quen non viu a alguén, na tele ou nalgunha revista, cun par de toros de cogombro sobre as pálpebras? 😉 Hoxe dedicámoslle o especial #GadisSalud para compartir contigo algunhas das súas propiedades e beneficios, e tamén algunha receita para que aproveites todos os seus beneficios, que son moitos. Queres coñecelos? Segue lendo!

Orixe e variedades do cogombro

O cogombro forma parte da familia Cucurbitaceae, do mesmo xeito que a cabaciña, a sandía e a cabaza. O seu cultivo é orixinario da India, onde se documentou a súa presenza hai máis de 3.000 anos. De aí, pasou a Exipto, converténdose nun dos alimentos preferidos dos faraóns, e a Grecia. Cando os romanos conquistaron a Antiga Grecia, o cultivo de cogombro estendeuse ao resto de Europa.
Sabías que o cogombro é unha das hortalizas máis consumidas do mundo? En parte porque se pode atopar durante todo o ano, aínda que a súa tempada de recolección é entre abril e outubro. Tamén conta cunha alta demanda na súa versión industrializada. España é o terceiro país produtor da Unión Europea e representa o 25% do total do cultivo nos países membros, con Andalucía como a rexión con maior produción de cogombros.
Existen distintas variedades de cogombro, que se diferencian polo tamaño, a forma, a cor e o sabor. Estas son as máis coñecidas:
– Cogombro holandés. Tamén se lle chama “de Almería” e é a variedade máis exportada de España a outros países. Cun tamaño de entre 25 e 30 cm, este cogombro soporta altas temperaturas e a súa cor é verde escuro brillante. O seu sabor é suave e dixestivo.
– Cogombro español. Caracterízase por non ser moi longo (10-15 cm), de cor verde escura e espiña. Ten un sabor e un aroma intenso.
– Cogombro francés. É un pouco máis grande que o español (15-20 cm). De cor verde escura e menos espiñas, ten un sabor máis suave e é o que se adoita utilizar para o gazpacho.
– Cogombro armenio. Tamén se coñece polo nome de cogombro serpe pola súa forma tan particular. É moi longo e retorcido. A súa pel é estriada e o seu interior, de cor amarela.
– Cogombro inglés. Tamén coñecido como cogombro de invernadoiro ou cogombro europeo, caracterízase por unha pel lisa e por non ter pebidas no seu interior, o que axuda á súa dixestión.
– Cogombro xaponés. Coñécese tamén como cogombro kyuri. É pequeno, escuro e con pequenos vultos na súa pel grosa. O seu sabor é doce e a súa textura, crocante.

Os beneficios do cogombro

O cogombro contén unha gran cantidade de nutrientes, desde vitaminas do grupo B ata minerais como acedo fólico, calcio, ferro ou magnesio. A súa achega calórica é baixa e o equilibrio da súa composición proporciona grandes beneficios para o organismo. Estes son algúns dos máis destacados:
– É un antioxidante natural grazas ao seu contido en vitamina C, que estimula o sistema inmunitario, fomenta a produción de coláxeno e protexe fronte ao dano dos radicais libres.
– O seu alto contido en potasio axuda a regular a tensión arterial, protexe o sistema nervioso e confírelle, ademais, unha función depuradora e diurética.
– Entre os seus nutrientes atópanse uns compostos denominados lariciresinol, pinoresinol e secoisolariciresinol, que exercen un efecto protector fronte a enfermidades cardiovasculares e ante varios tipos de cancro, como os de mama, útero, ovario e próstata.
– Ten un efecto antiinflamatorio, actuando sobre enzimas inflamatorias.
– Axuda a combater o estrés grazas ao seu contido en vitaminas do grupo B.
– Facilita as dixestións porque contribúe a mellorar o PH do estómago e combater o refluxo.

Cociña con cogombro

O cogombro é un dos ingredientes típicos das ensaladas cando chega o bo tempo. Pero hai moitas maneiras de introducilo nos teus menús e non todas son pratos fríos. Elixe aqueles que teñan a pel verde escura, sen manchas amarelas e que sexan firmes ao tacto. Procura que non sexan demasiado grandes se non che gustan con sabor amargo. Pódense conservar ata cinco días na neveira. Aquí tes unha receita coa que esperamos que sorprendas aos teus comensais.

Albóndegas vexetais con salsa de cogombro

Ingredientes
– 350 g lentellas cocidas
– 100 g espinacas cocidas
– 1 cenoria
– 2 ovos
– 2 dentes de allo
– 250 g pan relado
– 1 culleradiña comiño moído
– 125 g queixo de cabra
– 2 iogures gregos
– 1 cogombro
– 1 ramiña de coandro
– 1 ramiña de menta
– zume de limón
– aceite de oliva
– pementa
– sal
Preparación
1. Lava, pela e parte a cenoria. Vértea no vaso da batedora coas lentellas, as espinacas, un dente de allo, o comiño, o coandro, sal e pementa. Tritura.
2. Engade os ovos, báteos e incorpóraos á mestura con dúas culleradas de pan relado.
3. Dá forma ás albóndegas, introducindo previamente un dado de queixo de cabra no seu interior. Pásaas por pan relado e colócaas sobre unha bandexa de forno.
4. Prequenta o forno a 200° e enforna 15 minutos as albóndegas. Sácaas e déixaas arrefriar.
5. Tritura o cogombro cos iogures, o outro dente de allo, a menta, 1 cullerada de aceite, outra de zume de limón e un chisco de sal e pementa.
6. Serve as albóndegas acompañadas coa salsa.
Gústache o cogombro? Utilízalo para ensaladas ou tes algunha receita estrela? Cóntanos!